വന്ദേഭാരതത്തിലെ ഭക്ഷണത്തെ റിവ്യൂ ചെയ്ത് പഴയിടം മോഹനൻ നമ്പൂതിരി. അത്യാവശ്യം നല്ല ഭക്ഷണമാണ് വന്ദേഭാരതിൽ ലഭിക്കുന്നതെന്നും നിസാര കാര്യങ്ങൾ ചൂണ്ടിക്കാട്ടി കുറ്റപ്പെടുത്തുന്നതിന് പകരം പുതിയൊരു സംവിധാനത്തെ പ്രോത്സാഹിപ്പിക്കുകയാണ് ചെയ്യേണ്ടതെന്നും അദ്ദേഹം പറഞ്ഞു. വന്ദേഭാരതിലെ ബ്രേക്ക് ഫാസ്റ്റ് കഴിച്ചതിന് ശേഷം ട്രെയിനിൽ ഇരുന്നുകൊണ്ട് അഭിപ്രായം പറയുന്ന പഴയിടത്തിന്റെ വീഡിയോയും വൈറലാണ്.
“വന്ദേഭാരതിൽ രാവിലെയാണ് യാത്ര ചെയ്യുന്നത്. വളരെ നല്ല ബ്രേക്ക് ഫാസ്റ്റാണ്. സ്റ്റാ‍ർ ഹോട്ടൽ സ്റ്റൈൽ ഒന്നുമല്ലെങ്കിലും നല്ല ഭക്ഷണമാണ്. ഇതൊക്കെ വലിയൊരു മാറ്റം തന്നെയല്ലേ, ആ മാറ്റത്തെ അംഗീകരിക്കുക, പ്രോത്സാഹിപ്പിക്കുക. വന്ദേഭാരത് തുടങ്ങിയ കാലത്ത് ഇതിൽ നിന്നും ലഭിക്കുന്ന ഭക്ഷണത്തിനെതിരെ വ്യാപക വിമർശനങ്ങൾ കേട്ടിരുന്നു. ഭക്ഷണം കൊള്ളില്ല, പൊറോട്ടയ്‌ക്ക് ഉപ്പില്ല, കറിക്ക് എരിവ് കൂടി എന്നീ നിസാര കാര്യങ്ങൾ ചൂണ്ടിക്കാട്ടി കുറ്റപ്പെടുത്തുന്നത് കണ്ടു. ഇതുപോലൊരു സംവിധാനത്തെ പ്രോത്സാഹിപ്പിച്ച് സ്വാഗതം ചെയ്യുന്നതിന് പകരം നിസാര കാര്യങ്ങൾക്ക് കുറ്റപ്പെടുത്തുന്നത് അത്ര ശരിയല്ല. സാമാന്യം നല്ല ഭക്ഷണമാണ് വന്ദേഭാരതിൽ നിന്നും ലഭിക്കുന്നത്. നല്ലതിനെ നല്ലതാണെന്ന് അംഗീകരിക്കാനുള്ള മനസ് നമുക്ക് എല്ലാവർക്കുമുണ്ടാകട്ടെ.” പഴയിടം പറഞ്ഞു.
ഏതാനും നാളുകൾക്ക് മുമ്പ് വന്ദേഭാരതിലെ ഭക്ഷണത്തിനെതിരെ ഫുഡ് വ്ളോഗർ മൃണാൾ അടക്കം ചിലർ വിമർശനം ഉന്നയിച്ചിരുന്നു. ഇതിന്റെ പശ്ചാത്തലത്തിലാണ് പഴയിടത്തിന്റെ പ്രതികരണം.
