മുംബൈ: പരിക്ക് ഭേദമാകാത്തതിനെ തുടർന്ന് ഇന്ത്യൻ ഓപ്പണർ ശിഖർ ധവാനെ ലോകകപ്പ് ടീമിൽ നിന്നും തിരിച്ചുവിളിച്ചു. പകരം വിക്കറ്റ് കീപ്പർ ബാറ്റ്സ്മാൻ ഋഷഭ് പന്തിനെ ടീമിൽ ഉൾപ്പെടുത്തി. ഇന്ത്യൻ ടീം മാനേജർ സുനിൽ സുബ്രഹ്മണ്യമാണ് ഇക്കാര്യം മാദ്ധ്യമങ്ങളെ അറിയിച്ചത്.
ഋഷഭ് പന്ത് ഇപ്പോൾ ലണ്ടനിൽ ടീമിനൊപ്പമുണ്ട്. ധവാന് പരിക്കേറ്റ സമയം റിസർവ് പ്ലെയർ എന്ന പേരിൽ പന്തിനെ ലണ്ടനിലേക്ക് വിളിപ്പിക്കുകയായിരുന്നു. ആദ്യ രണ്ട് മത്സരങ്ങളിൽ മികച്ച പ്രകടനം കാഴ്ചവച്ച ധവാന് ഓസ്ട്രേലിയയ്ക്ക് എതിരായ രണ്ടാം മത്സരത്തിലാണ് പരിക്കേറ്റത്.
പരിക്കേറ്റതിനെ തുടർന്ന് ധവാനെ തിരിച്ചുവിളിച്ചുവെന്ന് നേരത്തെ തന്നെ വാർത്തകൾ വന്നിരുന്നു. ധവാൻ മെഡിക്കൽ സംഘത്തിന്റെ നിരീക്ഷണത്തിലാണ് എന്നായിരുന്നു ബിസിസിഐയുടെ ഔദ്യോഗിക വിശദീകരണം.
