ലണ്ടൻ: ഇന്ത്യൻ ടീമിൽ ഓരോ കാര്യങ്ങളിലും മികച്ചവരും മോശമായവരുമാരെന്ന് പറയുകയാണ് മുൻ ഇന്ത്യൻ ഓപ്പണർ വീരേന്ദർ സേവാഗ്. ലോകകപ്പിനിടയിലാണ് അവതാരകയുടെ ചോദ്യത്തിന് ഉരുളയ്ക്ക് ഉപ്പേരിപോലെ മറുപടിയുമായി സേവാഗ് എത്തിയത്. തമാശ രൂപേണയുള്ള സേവാഗിന്റെ ഉത്തരങ്ങൾ ഇതിനോടകം തന്നെ വൈറലായിക്കഴിഞ്ഞു.
ടീമിലെ സെൽഫി കൂടുതൽ ഇഷ്ടപ്പെടുന്ന താരം ആര് എന്നതായിരുന്നു ആദ്യ ചോദ്യം. ഒന്ന് ആലോചിച്ചതിന് ശേഷം മറുപടിയെത്തി. അത് ഇന്ത്യൻ നായകൻ വിരാട് കോഹ് ലിയാണെന്ന്. വിരാട് എവിടെ പോയാലും ആളുകൾക്ക് വേണ്ടി സെൽഫിയെടുത്ത് നൽകുമെന്നും താനും ഇപ്പോൾ അങ്ങനെയാണെന്നും വീരു പറഞ്ഞു.
ടീമിലെ മോശം ഡാൻസർ ആരെന്നതായിരുന്നു അടുത്ത ചോദ്യം. ആലോചിക്കുന്നതിനു മുൻപേ മറുപടിയെത്തി. അത് സച്ചിനാണ്. ടീമിലെ മികച്ച പാചകക്കാരനും സച്ചിനാണെന്നും അടുത്ത ചോദ്യത്തിന് മറുപടിയായി വീരു പറഞ്ഞു.
ടീമിലെ മികച്ച പാട്ടുകാരൻ ആരെന്ന ചോദ്യത്തിന് സുരേഷ് റെയ്ന എന്നായിരുന്നു മറുപടി. സ്വന്തം പാട്ടിനെ പറ്റി ചോദിച്ചപ്പോൾ താനൊരു ബാത്ത് റൂം സിംഗറാണെന്ന് സേവാഗ് പ്രതികരിച്ചു. ടീമിലെ പ്രത്യേകം ശ്രദ്ധിക്കേണ്ട താരം അനിൽ കുംബ്ലൈയാണ്. കാരണം അദ്ദേഹം കളിക്കളത്തിൽ ബഹളക്കാരനായിരുന്നുവെങ്കിലും ഡ്രസ്സിംഗ് റൂമിൽ ശാന്തനായിരുന്നു. അതിനാൽ തന്നെ വലിയ ബഹളമുണ്ടാക്കി അദ്ദേഹത്തെ ശല്യം ചെയ്യാതിരിക്കാൻ താൻ ശ്രദ്ധിക്കുമായിരുന്നു.
ഒപ്പം നടക്കാൻ ഇഷ്ടമില്ലാത്ത താരം ആരെന്ന ചേദ്യത്തിന് മുൻ ഇന്ത്യൻ നായകൻ മഹേന്ദ്ര സിംഗ് ധോണി എന്നായിരുന്നു മറുപടി. അതിന് കൃത്യമായ വിശദീകരണവുമുണ്ട് സേവാഗിന്. ധോണിയെ ഒരുപാടുപേർ പിന്തുടരുന്നതുകൊണ്ടാണ് അത് സാധിക്കാത്തതെന്ന് അദ്ദേഹം പറഞ്ഞു.
ഡിഷ് ദ ഡർട്ട് എന്ന് പേരിലാണ് ഐസിസി തങ്ങളുടെ സാമൂഹിക മാദ്ധ്യമ അക്കൗണ്ടുകളിൽ വീഡിയോ അപ് ലോഡ് ചെയ്തിരിക്കുന്നത്.
https://www.facebook.com/icc/videos/1199940223522179/
