കൊച്ചി : ഡച്ച് ഡിഫൻഡർ ജിയാനി സൂയിവെർലൂണുമായി കേരള ബ്ലാസ്റ്റേഴ്സ് കരാറിൽ ഒപ്പിട്ടു. നെതർലന്റിലെ റൊട്ടർഡാം സ്വദേശിയായ സൂയിവെർലൂൻ തന്റെ ഫുട്ബോൾ കരിയർ ആരംഭിക്കുന്നത് ഫെയെനൂർഡ് ക്ലബ്ബിന്റെ യുവ ടീമിലാണ്. 2004 ൽ ഫെയെനൂർഡ് സീനിയർ ടീമിന് വേണ്ടി അരങ്ങേറ്റം കുറിച്ചു. പ്രീമിയർ ലീഗിലും ലലീഗയിലും മല്ലോർക്കയ്ക് വേണ്ടി കളിച്ചു.
പിന്നീട് ഡച്ച് ഫുട്ബോളിലേക്കു തിരികെയെത്തിയ അദ്ദേഹം കൾച്ചറൽ ലിയോനിസ്സയ്ക് വേണ്ടി രണ്ടു സീസണുകളിൽ കുപ്പായമണിഞ്ഞു. നെതർലൻഡ് അണ്ടർ 19 യൂറോപ്യൻ ചാംപ്യന്മാരായപ്പോൾ ടീമംഗമായിരുന്നു സൂയിവേർലുണ്. 2018 ൽ ഡൽഹി ഡിനോമോസിന്റെ താരമായി ഇന്ത്യൻ സൂപ്പർ ലീഗിൽ എത്തി.
രാജ്യത്തെ ഏറ്റവും കൂടുതൽ ആരാധകരുള്ള കേരള ബ്ലാസ്റ്റേഴ്സിന് വേണ്ടി കളിക്കാൻ കഴിയുന്നതിൽ ആഹ്ലാദിക്കുന്നുവെന്നും ഈ സീസണിൽ ക്ലബ്ബിനോടൊപ്പം ഏറ്റവും മികച്ച ഫുട്ബോൾ കളിക്കുമെന്നും സൂയിവെർലൂൺ പറഞ്ഞു.
ഹോളണ്ട് ,ഇംഗ്ലണ്ട്,സ്പെയിൻ തുടങ്ങിയ രാജ്യങ്ങളിലെ ക്ലബുകളിൽ കളിച്ച് പരിചയ സമ്പന്നനായ സൂയിവെർലൂൺ ബ്ലാസ്റ്റേഴ്സിന്റെ പ്രതിരോധ നിരയ്ക്ക് മുതൽ കൂട്ടാണെന്ന് കോച്ച് എൽക്കോ ഷറ്റോറി പറഞ്ഞു. അദ്ദേഹത്തെ സെൻട്രൽ ബാക്, ഹോൾഡിംഗ് മിഡ്ഫീൽഡർ, റൈറ്റ് ബാക് തുടങ്ങിയ പൊസിഷനുകളിൽ ഉപയോഗിക്കാനാകും.
പ്രതിരോധ നിരയിൽ പാറ പോലെ ഉറച്ചു നിൽക്കാനുള്ള അദ്ദേഹത്തിന്റെ കഴിവ് അപാരമാണെന്നും ഷറ്റോരി പറഞ്ഞു.
