ക്വാലാലംപൂര്: ലോകകപ്പ് ഫുഡ്ബോളിന്റെ രണ്ടാം റൗണ്ട് ഏഷ്യന് യോഗ്യത മത്സരങ്ങളില് ഇന്ത്യ എളുപ്പമുള്ള ഗ്രൂപ്പില്. ഖത്തര്, ഒമാന്, അഫ്ഗാനിസ്ഥാന്, ബംഗ്ലാദേശ് എന്നിവരാണ് ഇന്ത്യയ്ക്കൊപ്പം ഗ്രൂപ്പ് ‘ഈ’ യില് ഉള്ളത്.
40 ഏഷ്യന് രാജ്യങ്ങളാണ് 8 ഗ്രൂപ്പുകളായി ലോകകപ്പ് യോഗ്യതയ്ക്കായി മത്സരിക്കുന്നത്.സെപ്തംബറില് നടക്കാനിരിക്കുന്ന മത്സരങ്ങളില് എല്ലാ ടീമുകളും സ്വന്തം മൈതാനത്തും പുറത്തുമായി റൗണ്ട് റോബിന് മത്സരങ്ങളിലൂടെയാണ് യോഗ്യത തെളിയിക്കേണ്ടത്. 8 ഗ്രൂപ്പ് ജേതാക്കളും രണ്ടാം സ്ഥാനക്കാരും അവസാനഘട്ടത്തിലെ 2022ലെ ലോകകപ്പ് യോഗ്യതാമത്സരങ്ങളില് കളിക്കും തുടര്ന്ന് 2023ലെ എഎഫ്സി-ഏഷ്യന് കപ്പ് ഫൈനല് മത്സരത്തില് ചൈനയില് കളിക്കണം.
നറുക്കെടുപ്പില് ഇന്ത്യ പ്രബലരായ ഇറാന്, ജപ്പാന്, കൊറിയ, ഓസ്ട്രേലിയ, സൗദി അറേബ്യ എന്നിവരേയും ഇറാഖ്, ഉസ്ബക്കിസ്ഥാന് എന്നീ കരുത്തരേയും സമര്ത്ഥമായി ഒഴിവാക്കി.നറുക്കെടുപ്പിന്റെ സമയത്ത് പോട്ട് തിരഞ്ഞെടുക്കാമെന്ന ആനുകൂല്യം പയോഗിച്ചാണ് താരതമ്യേന ദുര്ബലരായ ഗ്രൂപ്പുകളെ രണ്ടാം റൗണ്ടില് എതിരാളികളായി ലഭിച്ചത്.ഗ്രൂപ്പില് ഇന്ത്യയ്ക്ക് അഫ്ഗാനേയും ബംഗ്ലാദേശിനേയും എളുപ്പത്തില് തോല്പ്പിക്കാനും യോഗ്യതനേടി എത്തിയാല് അവസാനറൗണ്ടില് ഒമാനുമായും ലോകകപ്പ് ആതിഥേയരായ ഖത്തറുമായും മികച്ച കളി പുറത്തെടുക്കാനുമാകും.2018ലെ ലോകകപ്പില് ഇന്ത്യ ഒമാനെ സമനിലയില് പിടിച്ചിരുന്നു.