ന്യൂഡല്ഹി: ജമ്മു കാശ്മീരിലേക്ക് സൈനിക സേവനത്തിനായി പോകുന്ന ഇന്ത്യന് ക്രിക്കറ്റ് താരം മഹേന്ദ്രസിങ് ധോണിക്ക് പ്രത്യേക സംരക്ഷണം ഏര്പ്പെടുത്തേണ്ടതില്ലെന്ന് കരസേനാ മേധാവി ബിപിന് റാവത്ത്. മറ്റു സൈനികര്ക്കൊപ്പം അദ്ദേഹം നാടിനെ സംരക്ഷിക്കുകയാണ് ചെയ്യുകയെന്നും അദ്ദേഹം പറഞ്ഞു.
ടെറിട്ടോറിയല് ആര്മിയില് ലഫ്റ്റനന്റ് കേണലായ ധോണി സൈനിക ചുമതലകള് നിര്വഹിക്കാന് പ്രാപ്തനാണ്. ഏതൊരു സൈനികനെയും പോലെ ധോണിക്കും സംരക്ഷകന്റെ കര്ത്തവ്യമാണെന്നും ബിപിന് റാവത്ത് പറഞ്ഞു.
സൈനിക യൂണിഫോം മോഹിക്കുന്ന ഏതൊരു ഇന്ത്യക്കാരനും അതേ യൂണിഫോമില് ചെയ്യേണ്ട കര്ത്തവ്യങ്ങള് നിറവേറ്റാന് ബാധ്യസ്ഥനാണ്. സൈനിക സേവനത്തിനു മുന്നോടിയായി അടിസ്ഥാന പരിശീലനം ധോണി നേടിക്കഴിഞ്ഞു. ഏല്പ്പിക്കുന്ന ഉത്തരവാദിത്തങ്ങള് ഭംഗിയായി നിറവേറ്റാന് അദ്ദേഹം പ്രാപ്തനാണെന്ന് ഞങ്ങള്ക്ക് ഉറപ്പുണ്ടെന്നും അദ്ദേഹം മാദ്ധ്യമങ്ങളോട് പ്രതികരച്ചു.
ടെറിട്ടോറിയല് ആര്മിയില് ലഫ്റ്റനന്റ് കേണലായ ധോണി രണ്ടു മാസത്തേക്കാണ് സൈനിക സേവനത്തിനു പോകുന്നത്. ജൂലൈ 31ന് കശ്മീരിലെത്തുന്ന ധോണി ഓഗസ്റ്റ് 15 വരെയുള്ള 16 ദിവസം 106 പാരാ ബറ്റാലിയനില് പട്രോളിങ്, ഗാര്ഡ്. ഔട്ട്പോസ്റ്റ് ചുമതലകള് നിര്വഹിക്കും. സൈനികര്ക്കൊപ്പമായിരിക്കും ധോണിയുടെ താമസം. നിലവില് ധോണി ബംഗ്ലൂരുവിലെ ബറ്റാലിയന് ആസ്ഥാനത്ത് പരിശീലനത്തിലാണ്.
സൈനിക സേവനത്തിനായി ഇന്ത്യന് ക്രിക്കറ്റ് ടീമിന്റെ വെസ്റ്റിന്ഡീസ് പര്യടനത്തില് നിന്നും ധോണി പിന്മാറിയിരുന്നു.
