ന്യൂയോര്‍ക്ക്: 16 വര്‍ഷം മുമ്പ് എഴുതപ്പെട്ട 400 മീറ്റര്‍ ഹര്‍ഡില്‍സിലെ ലോകറെക്കോര്‍ഡ് തിരുത്തി ഒളിമ്പിക് ചാമ്പ്യന്‍ ദലീല മുഹമ്മദ്. യു.എസ് ചാമ്പ്യന്‍ഷിപ്പില്‍ 52.20 സെക്കന്റില്‍ ഓടിയെത്തിയാണ് അമേരിക്കന്‍ താരമായ 29ക്കാരി ദലീല പുതിയ റെക്കോഡിട്ടത്.
ആദ്യ 300 മീറ്ററില്‍ തന്നെ ദലീല ലീഡെടുത്തിരുന്നു. ഫിനിഷിങ് വരെ ഇതു നിലനിര്‍ത്താന്‍ അമേരിക്കന്‍ താരത്തിനു കഴിഞ്ഞു. 52.88 സെക്കന്റില്‍ ഫിനിഷ് ചെയ്ത സിഡ്‌ന മക്‌ലോഗിന്‍ വെള്ളി നേടി. 53.11 സെക്കന്റില്‍ ഫിനിഷ് ചെയ്തു ആഷ്‌ലി സ്‌പെന്‍സര്‍ക്ക് വെങ്കലം സ്വന്തമാക്കി.
തന്റെ പരിശീലകന്‍ തന്നോട് റെക്കോഡ് ഭേദിക്കാനാകുമെന്ന് എപ്പോഴും പറയാറുണ്ടെങ്കിലും ആ സ്വപ്‌ന നിമിഷത്തില്‍ അമ്പരന്നുപോയെന്ന് ദലീല മത്സരശേഷം പ്രതികരിച്ചു.
2003ല്‍ 52.34 സെക്കന്റില്‍ ഓടിയെത്തിയ റഷ്യയുടെ യുലിയ പെച്ചോന്‍കിനയുടെ പേരിലുള്ള റെക്കോഡാണ് തിരുത്തിയത്.
