മുംബൈ: ഇന്ത്യന് ക്രിക്കറ്റ് ടീമില് താരങ്ങള്ക്കിടയില് ഭിന്നതകളുണ്ടെന്ന വാദം തെറ്റാണെന്ന് പരിശീലകന് രവി ശാസ്ത്രി. ടീമില് യാതൊരു വിധ പ്രശ്നങ്ങളുമില്ലെന്നും ഒരു താരവും ടീമിനേക്കാള് വലുതല്ലെന്നും അദ്ദേഹം കൂട്ടിച്ചേര്ത്തു.
അതേ സമയം ടീമിലെ അന്തരീക്ഷം കലുഷിതമാണെങ്കില് ഇത്രയധികം വിജയം നേടാന് ടീമിനു എങ്ങനെ സാധിക്കുന്നുവെന്ന് കോഹ്ലി പ്രതികരിച്ചു. വെസ്റ്റിന്ഡീസ് പര്യടനത്തിനു മുന്പുള്ള വാര്ത്താസമ്മേളനത്തില് സംസാരിക്കുകയായിരുന്നു ഇരുവരും.
വ്യക്തിപരമായ കാര്യങ്ങള് പൊതുവേദികളിലേക്ക് വലിച്ചിഴക്കുന്നത് ഉചിതമല്ലെന്നും നല്ല കാര്യങ്ങള്ക്കു നേരെ കണ്ണടച്ച് ഊഹാപോഹങ്ങള് പ്രചരിപ്പിക്കുന്നത് ശരിയല്ലെന്നും, ഇത്തരം വാര്ത്തകള്ക്കു പിന്നില് പലരുടെയും സ്വാര്ത്ഥ താല്പര്യങ്ങളുണ്ടെന്നും കോഹ്ലി ചൂണ്ടി കാണിച്ചു.
ഒരു മാസം നീളുന്ന വെസ്റ്റിന്ഡിസ് പര്യടനത്തിനായി ഇന്ത്യന് ടീം ഇന്നു പുറപ്പെടും. അതേസമയം പര്യടനത്തില് നിന്ന് വിശ്രമമെടുക്കാന് സെലക്ടര്മാര് തന്നോട് ആവശ്യപ്പെട്ടിട്ടില്ലെന്നു കോഹ്ലി വ്യക്തമാക്കി. ലോകകപ്പിനു ശേഷം ടീമെന്ന നിലയില് കൂട്ടായ്മയും ഒത്തിണക്കവും നിലനിര്ത്തേണ്ട നിര്ണായക സമയമാണിതെന്നും അദ്ദേഹം പറഞ്ഞു.
രോഹിത് ശര്മ്മയും കോഹ്ലിയും തമ്മിലുള്ള അഭിപ്രായ ഭിന്നതകളെക്കുറിച്ചള്ള അഭ്യൂഹങ്ങള് നിലനില്ക്കുന്നതിനാല് കോഹ്ലി മാധ്യമങ്ങളെ കാണില്ല എന്ന സൂചനകള് ഉണ്ടായിരുന്നെങ്കിലും ബിസിസിഐ പിന്നീട് കോഹ്ലി മാധ്യമങ്ങളെ കാണുമെന്ന് സ്ഥിരീകരണം നടത്തുകയായിരുന്നു.
