ബര്‍മിംഗ്ഹാം: ആഷസ് പരമ്പരയിലെ ആദ്യ ടെസ്റ്റിന്റെ ഒന്നാം ഇന്നിംഗ്‌സില്‍ ഓസ്‌ട്രേലിയക്കു ബാറ്റിംഗ് തകര്‍ച്ച. ടോസ് ആദ്യം നേടി ബാറ്റിംഗിനിറങ്ങിയ ഓസ്‌ട്രേലിയ ആദ്യ ദിവസം തന്നെ 284 റണ്‍സിനു പുറത്തായി. എന്നാല്‍ തോല്‍വിയിലും സ്റ്റീവ് സ്മിത്തിന്റെ സെഞ്ച്വറി ഓസ്‌ട്രേലിയക്ക് ഭേദപ്പെട്ട സ്‌കോര്‍ സമ്മാനിച്ചു.
പന്ത് ചുരണ്ടല്‍ വിവാദത്തില്‍ ലഭിച്ച വിലക്കിനു ശേഷം തിരിച്ചെത്തിയ സ്റ്റീവ് സ്മിത്തിന്റെ ആദ്യ ടെസ്റ്റായിരുന്നു ഇത്. 219 പന്തില്‍ 16 ഫോറും രണ്ട് സിക്‌സും ഉള്‍പ്പെടെ 144 റണ്‍സ് നേടിയാണ് സ്മിത്ത് മടങ്ങിയത്. പീറ്റര്‍ സിഡിലും, ട്രാവിസ് ഹെഡും, ഉസ്മാന്‍ ഖ്വാജയും, നഥാന്‍ ലിയോണും മാത്രമാണ് രണ്ടക്കം കടന്നത്.
ഇംഗ്ലണ്ടിനു വേണ്ടി ബ്രോഡ് 5 ഉം വോക്‌സ് 3 ഉം വിക്കെറ്റെടുത്തു. ബെന്‍ സ്റ്റോക്ക്‌സും മോയിന്‍ അലിയും ഓരോ വിക്കറ്റ് വീതം വീഴ്‌ത്തി. നാല് ഓവര്‍ മാത്രം ബോള്‍ ചെയ്ത ജയിംസ് ആന്‍ഡേസണ് പരിക്കേറ്റത് ഇംഗ്ലണ്ടിനു തിരിച്ചടിയായി.
മറുപടി ബാറ്റിംഗിനിറങ്ങിയ ഇംഗ്ലണ്ട് ഒന്നാം ദിവസം കളി നിര്‍ത്തുമ്പോള്‍ വിക്കറ്റൊന്നും നഷ്ടപ്പെടാതെ പത്ത് റണ്‍സെടുത്തിട്ടുണ്ട്. ജേസണ്‍ റോയും, റോറി ബേണ്‍സും ആണ് ക്രീസില്‍.
