ന്യൂയോര്ക്ക്: തൊഴിലാളികളോടൊപ്പം നിന്ന സ്ഥാപനമാണ് ഗൂഗിള്. മനസ് തുറന്ന് സംസാരിക്കാനും, ചിന്തകള് പങ്കുവെക്കാനും, കാഴ്ചപാടുകളെ പ്രകടിപ്പിക്കാനുമുള്ള അവസരം ജീവനക്കാര്ക്ക് നല്കിയിട്ടുണ്ട്. എന്നാല് ഗൂഗിള് ഇപ്പോള് ജീവനക്കാര്ക്ക് പുതിയ മാര്ഗ നിര്ദ്ദേശവുമായി രംഗത്തെത്തിയിരിക്കുകയാണ്.
രാഷ്ട്രീയ തര്ക്കങ്ങള്, ചര്ച്ചകള് തൊഴില് സ്ഥലത്ത് ഒഴിവാക്കാണമെന്ന് ഗൂഗിള് ആവശ്യപ്പെട്ടു. സ്ഥാപനത്തില് ജോലിയുമായി ബന്ധപ്പെട്ട കാര്യത്തില് മാത്രം പ്രാധാന്യം നല്കണമെന്നും കമ്പനി അറിയിച്ചു. സ്ഥാപനത്തെ ചുറ്റിപ്പറ്റി ഉയരുന്ന വിവാദങ്ങളാണ് പുതിയ നിയന്ത്രണങ്ങള്ക്ക് പ്രധാന കാരണം.
ജോലിസ്ഥലത്ത് പാലിക്കേണ്ട പുതിയ മാര്ഗ്ഗനിര്ദ്ദേശങ്ങള് അടങ്ങിയ സര്ക്കുലര് കഴിഞ്ഞ ദിവസമാണ് ഗൂഗിള് നല്കിയത്. ഏകദേശം ഒരു ലക്ഷത്തോളം വരുന്ന ജീവനക്കാര്ക്കാണ് സര്ക്കുലര് നല്കിയത്.
ഓരോരുത്തരുടേയും പ്രാഥമിക ഉത്തരവാദിത്തം ജോലി ചെയ്യുക എന്നതു മാത്രമാണ്. പരസ്പരം അപമാനിക്കുക, കമ്പനിയെക്കുറിച്ച് തെറ്റിദ്ധരിപ്പിക്കുക തുടങ്ങിയ കാര്യങ്ങളില് നിന്നും വിട്ടു നില്ക്കണമെന്ന് സ്ഥാപനം നിര്ദ്ദേശം നല്കി. രാഷ്ട്രീയ ചര്ച്ച, വാര്ത്താ ചര്ച്ചകള് തുടങ്ങിയവ പ്രവൃത്തി ദിനത്തെ തടസ്സപ്പെടുത്തരുതെന്നും ഗൂഗിളിലെ മാര്ഗനിര്ദേശങ്ങളില് പറയുന്നു.
കമ്പനിയെ ചോദ്യം ചെയ്യാനും, ആശങ്കകള് ഉന്നയിക്കാനും സ്വാതന്ത്ര്യമുണ്ട്. യഥാര്ഥ വിവരങ്ങള് അറിഞ്ഞതിനു ശേഷം മാത്രം സംസാരിക്കുക. അതോടൊപ്പം നമ്മുടെ ഉത്പന്നങ്ങളോ, സ്ഥാപനത്തിന്റെ വിശ്വാസ്യത തകര്ക്കുന്നതുമായ പ്രസ്താവനകള് നടത്തരുതെന്നും സര്ക്കുലറില് പറയുന്നു.
