മുംബൈ: സാമൂഹിക മാദ്ധ്യമങ്ങളായ ഫേസ്ബുക്കും ഇൻസ്റ്റഗ്രാമും പണിമുടക്കി. രാത്രി 10 മണിയോടെയാണ് ഫേസ്ബുക്കിന്റെ ഉടമസ്ഥതയിലുള്ള സാമൂഹിക മാദ്ധ്യമങ്ങൾ നിശ്ചലമായത്. ഇവ നിശ്ചലമായതോടെ ഉപഭോക്താക്കൾ ട്വിറ്ററിൽ പ്രതിഷേധവുമായി രംഗത്തെത്തി. ഫേസ്ബുക് ഡൗൺ, ഇൻസ്റ്റഗ്രാം ഡൗൺ എന്നീ ഹാഷ്ടാഗുകൾ ഇപ്പോൾ ട്വിറ്ററിൽ ട്രെന്റിംഗിലാണ്.
ഫേസ്ബുക്കിന്റെ മെയിൻ ഹോം പേജിൽ സൈഡ് ബാറിലുള്ളവ മാത്രമേ ലോഡ് ആയി വന്നിരുന്നുള്ളൂ. പ്രശ്നമുണ്ടായിരുന്നില്ലെങ്കിലും പേജുകൾ കൈകാര്യം ചെയ്യുന്നവരെ ഇത് സാരമായി ബാധിച്ചു. പേജുകളുടെ ഹോം പേജിൽ കവർ ഫോട്ടോയും സൈഡ് ബാറിലുള്ള മെനുവും മാത്രമേ ലഭ്യമായിരുന്നുള്ളൂ. അതിന് താഴെയുള്ള പോസ്റ്റുകൾ ഒന്നും ദൃശ്യമായിരുന്നില്ല.
പുതിയ പോസ്റ്റുകൾ പബ്ലിഷ് ചെയ്യാനും സാധിച്ചിരുന്നില്ല. ഒപ്പം പബ്ലിഷിംഗ് ടൂൾസ് ഓപ്പൺ ചെയ്യുമ്പോൾ Sorry, something went wrong എന്ന മെസേജാണ് കാണിച്ചിരുന്നത്. ക്രിയേറ്റർ സ്റ്റുഡിയോ ഓപ്പൺ ചെയ്യുമ്പോൾ ഒന്നും തന്നെ ലോഡ് ആയിരുന്നുമില്ല. എന്നാൽ മൊബൈൽ ഉപഭോക്താക്കളെ പ്രശ്നം കാര്യമായി ബാധിച്ചില്ല.
അതേസമയം, പ്രശ്നങ്ങൾ ഉടൻ പരിഗണിക്കുമെന്ന് ഫേസ്ബുക് അറിയിച്ചിട്ടുണ്ട്. തങ്ങളുടെ ഉടമസ്ഥതയിലുള്ള സാമൂഹിക മാദ്ധ്യമങ്ങളിൽ ചില സാങ്കേതിക പ്രശ്നങ്ങളുണ്ടെന്നും അത് ഉടൻ പരിഹരിക്കുമെന്നും ഇൻസ്റ്റഗ്രാം തങ്ങളുടെ ട്വിറ്റർ ഹാന്റിലിലൂടെ അറിയിച്ചിട്ടുണ്ട്.
