ഓക്ലന്ഡ്: ഇന്ത്യ-ന്യൂസിലന്ഡ് ട്വന്റി20 പരമ്പരക്ക് നാളെ തുടക്കം. അഞ്ച് മത്സരങ്ങളടങ്ങിയ പരമ്പരയിലെ ആദ്യ മത്സരം നാളെ ഓക്ലന്ഡില് നടക്കും. ഇന്ത്യന് സമയം ഉച്ചക്ക് 12.20നാണ് മത്സരം ആരംഭിക്കുക.
ഓസ്ട്രേലിയക്കെതിരായ ഏകദിന പരമ്പര നേടിയതിന്റെ ആത്മവിശ്വാസവുമായാണ് ടീം ഇന്ത്യ ന്യൂസിലന്ഡില് എത്തിയത്. ഏകദിന ലോകകപ്പിന്റെ സെമി ഫൈനലിലാണ് ഇരു ടീമുകളും അവസാനമായി ഏറ്റുമുട്ടിയത്. അവസാനമായി ന്യൂസിലന്ഡില് പര്യടനം നടത്തിയപ്പോള് ഏകദിന പരമ്പര ഇന്ത്യയും ട്വന്റി20 പരമ്പര ന്യൂസിലന്ഡുമാണ് സ്വന്തമാക്കിയിരുന്നത്.
ഓസീസ് പരമ്പരയില് ബാറ്റ്സ്മാന്മാരും ബൗളര്മാരും ഒരു പോലെ മികച്ച പ്രകടനം പുറത്തെടുത്തത് ഇന്ത്യക്ക് ശുഭ പ്രതീക്ഷ നല്കുന്നു. അവസാന മത്സരത്തില് സെഞ്ച്വറി നേടിയ രോഹിത്തും തുടര്ച്ചയായി അര്ദ്ധ സെഞ്ച്വറികള് നേടിയ ഇന്ത്യന് നായകന് വിരാട് കോഹ്ലിയും മികച്ച ഫോമിലാണ്. നവ്ദീപ് സൈനി, മുഹമ്മദ് ഷമി, ജസ്പ്രീത് ബൂമ്ര എന്നിവരും മികച്ച പ്രകടനം കാഴ്ചവെച്ചിരുന്നു. പരിക്കേറ്റ ഓപ്പണര് ശിഖര് ധവാന് പകരക്കാരനായി മലയാളി താരം സഞ്ജു സാംസണ് ട്വന്റി20 പരമ്പരയില് കളിക്കും.
മറുഭാഗത്ത്, നായകന് കെയിന് വില്യാംസണ് ന്യൂസിലന്ഡ് ടീമില് തിരിച്ചെത്തി. പരിക്കിന്റെ പിടിയിലായിരുന്ന പേസര്മാരായ ട്രെന്ഡ് ബോള്ട്ടും ലോക്കി ഫെര്ഗൂസണും ടീമിനൊപ്പം ചേര്ന്നു. എന്നാല് കഴിഞ്ഞ മാസം സ്വന്തം നാട്ടില് നടന്ന ട്വന്റി20 പരമ്പരയില് ന്യൂസിലന്ഡ് ഓസ്ട്രേലിയയോട് 3-0ന് പരാജയം ഏറ്റുവാങ്ങിയിരുന്നു.
