ഓക്‌ലന്‍ഡ്: ഇന്ത്യ-ന്യൂസിലന്‍ഡ് ട്വന്റി20 പരമ്പരക്ക് ഇന്ന് തുടക്കം. അഞ്ച് മത്സരങ്ങളടങ്ങിയ പരമ്പരയിലെ ആദ്യ മത്സരം ഇന്ന് ഓക്‌ലന്‍ഡില്‍ നടക്കും. ഇന്ത്യന്‍ സമയം ഉച്ചക്ക് 12.20നാണ് മത്സരം ആരംഭിക്കുക.
ഓസ്‌ട്രേലിയക്കെതിരായ ഏകദിന പരമ്പര നേടിയതിന്റെ ആത്മവിശ്വാസത്തിലാണ് ടീം ഇന്ത്യ. ഏകദിന ലോകകപ്പിന്റെ സെമി ഫൈനലിലാണ് ഇരു ടീമുകളും അവസാനമായി ഏറ്റുമുട്ടിയത്. അവസാനമായി ന്യൂസിലന്‍ഡില്‍ പര്യടനം നടത്തിയപ്പോള്‍ ഏകദിന പരമ്പര ഇന്ത്യയും ട്വന്റി20 പരമ്പര ന്യൂസിലന്‍ഡുമാണ് സ്വന്തമാക്കിയിരുന്നത്.
ഓസീസ് പരമ്പരയില്‍ ബാറ്റ്‌സ്മാന്‍മാരും ബൗളര്‍മാരും ഒരു പോലെ മികച്ച പ്രകടനം പുറത്തെടുത്തത് ഇന്ത്യക്ക് ശുഭ പ്രതീക്ഷ നല്‍കുന്നു. അവസാന മത്സരത്തില്‍ സെഞ്ച്വറി നേടിയ രോഹിത്തും തുടര്‍ച്ചയായി അര്‍ദ്ധ സെഞ്ച്വറികള്‍ നേടിയ ഇന്ത്യന്‍ നായകന്‍ വിരാട് കോഹ്‌ലിയും മികച്ച ഫോമിലാണ്. നവ്ദീപ് സൈനി, മുഹമ്മദ് ഷമി, ജസ്പ്രീത് ബൂമ്ര എന്നിവരും മികച്ച പ്രകടനം കാഴ്ചവെച്ചിരുന്നു.
പരിക്കേറ്റ ഓപ്പണര്‍ ശിഖര്‍ ധവാന് പകരക്കാരനായി മലയാളി താരം സഞ്ജു സാംസണ്‍ ട്വന്റി20 പരമ്പരയില്‍ കളിക്കും. വിക്കറ്റ് കീപ്പറായി കെ.എല്‍ രാഹുല്‍ തുടരുമോ എന്നാണ് ഏവരും ഉറ്റുനോക്കുന്നത്. ധവാന്റെ അഭാവത്തില്‍ ഓപ്പണിംഗില്‍ രോഹിത്തിനൊപ്പം രാഹുല്‍ എത്തിയേക്കും. ഋഷഭ് പന്തിനെ കളിപ്പിക്കണോ അതോ അഞ്ച് ബൗളര്‍മാരുമായി ഇറങ്ങണോ എന്ന കാര്യത്തിലും വ്യക്തതയില്ല.
മറുഭാഗത്ത്, കഴിഞ്ഞ മാസം സ്വന്തം നാട്ടില്‍ നടന്ന ട്വന്റി20 പരമ്പരയില്‍ ന്യൂസിലന്‍ഡ് ഓസ്‌ട്രേലിയയോട് പരാജയം ഏറ്റുവാങ്ങിയിരുന്നു. അതേസമയം, നായകന്‍ കെയ്ന്‍ വില്യംസണ്‍ ന്യൂസിലന്‍ഡ് ടീമില്‍ തിരിച്ചെത്തി. പരിക്കിന്റെ പിടിയിലായിരുന്ന പേസര്‍മാരായ ട്രെന്‍ഡ് ബോള്‍ട്ടും ലോക്കി ഫെര്‍ഗൂസണും ടീമിനൊപ്പം ചേര്‍ന്നു.
ഇന്ത്യ: രോഹിത് ശര്‍മ, ലോകേഷ് രാഹുല്‍, വിരാട് കോഹ്‌ലി(ക്യാപ്റ്റന്‍), ശ്രേയസ് അയ്യര്‍, മനീഷ് പാണ്ഡെ, ശിവം ദുബെ, രവീന്ദ്ര ജഡേജ, കുല്‍ദീപ് യാദവ്, മുഹമ്മദ് ഷമി, നവദീപ് സെയ്‌നി, ജസ്പ്രീത് ബൂമ്ര.
ന്യൂസിലാന്‍ഡ്: മാര്‍ട്ടിന്‍ ഗപ്റ്റില്‍, കോളിന്‍ മണ്‍റോ, കെയ്ന്‍ വില്ല്യംസണ്‍ (ക്യാപ്റ്റന്‍), ടിം സെയ്‌ഫേര്‍ട്ട്, കോളിന്‍ ഡി ഗ്രാന്‍ഡോം, റോസ് ടെയ്‌ലര്‍, ഡാരില്‍ മിച്ചെല്‍, മിച്ചെല്‍ സാന്റ്‌നര്‍, സ്‌കോട്ട് ക്യുഗെലൈന്‍, ടിം സൗത്തി, ബ്ലെയര്‍ ടിക്ക്‌നര്‍.
