ഓക്‌ലന്‍ഡ്: ആദ്യ മത്സരത്തില്‍ ഇന്ത്യന്‍ ബൗളര്‍മാര്‍ പരീക്ഷിക്കപ്പെട്ടെങ്കില്‍ ഇത്തവണ വെള്ളം കുടിച്ചത് ന്യൂസിലന്‍ഡ് ബാറ്റ്‌സ്മാന്‍മാരാണ്. ബൗളര്‍മാര്‍ തുടക്കം മുതല്‍ റണ്‍സ് വിട്ടുകൊടുക്കാന്‍ പിശുക്കു കാണിച്ചപ്പോള്‍ കീവീസ് ബാറ്റ്‌സ്മാന്‍മാര്‍ക്ക് മറുപടിയുണ്ടായിരുന്നില്ല. ടോസ് നേടി ബാറ്റിംഗ് തെരഞ്ഞെടുത്ത ന്യൂസിലന്‍ഡിന് നിശ്ചിത 20 ഓവറില്‍ 5 വിക്കറ്റ് നഷ്ടത്തില്‍ 132 റണ്‍സെടുക്കാനേ കഴിഞ്ഞുള്ളൂ.
ഓപ്പണറായ മാര്‍ട്ടിന്‍ ഗുപ്ടിലിന്റേയും സീഫെര്‍ട്ടിന്റേയും പ്രകടനം മാറ്റി നിര്‍ത്തിയാല്‍ കീവീസ് നിരയില്‍ മറ്റാര്‍ക്കും കാര്യമായ സംഭാവന ചെയ്യാനായില്ല. ഗുപ്ടില്‍ 20 പന്തില്‍ 33 റണ്‍സെടുത്തപ്പോള്‍ സീഫെര്‍ട്ട് 26 പന്തില്‍ 33 റണ്‍സ് നേടി. കോളിന്‍ മന്റോ 26ഉം നായകന്‍ കെയ്ന്‍ വില്യംസണ്‍ 14ഉം ഗ്രാന്‍ഡ്‌ഹോം 3ഉം റണ്‍സെടുത്ത് പുറത്തായപ്പോള്‍ റോസ് ടെയ്‌ലര്‍(24 പന്തില്‍ 18) ഇന്ത്യന്‍ ബൗളര്‍മാരുടെ മുന്നില്‍ വിയര്‍ക്കുന്ന കാഴ്ചയാണ് കണ്ടത്.
ഇന്ത്യക്ക് വേണ്ടി 4 ഓവറില്‍ 18 റണ്‍സ് മാത്രം വഴങ്ങി 2 വിക്കറ്റ് വീഴ്‌ത്തിയ രവീന്ദ്ര ജഡേജയുടെ പ്രകടനമാണ് നിര്‍ണായകമായത്. ജസ്പ്രീത് ബൂമ്ര 4 ഓവറില്‍ 21 റണ്‍സ് വഴങ്ങി 1 വിക്കറ്റ് സ്വന്തമാക്കി. ശര്‍ദുല്‍ താക്കുര്‍, ശിവം ദുബെ എന്നിവര്‍ ഓരോ വിക്കറ്റ് വീതം വീഴ്‌ത്തി.
