ഓക്ലന്ഡ്: ഇന്ത്യന് പേസര് ജസ്പ്രീത് ബൂമ്രക്കെതിരെ റണ്സ് നേടാന് ബാറ്റ്സ്മാന്മാര് ബുദ്ധിമുട്ടുന്നത് എന്തുകൊണ്ടാണെന്ന് തുറന്നു പറഞ്ഞ് ന്യൂസിലന്ഡ് താരം ടിം സെയ്ഫെര്ട്ട്. ബൗളിംഗില് നിരവധി വൈവിധ്യങ്ങള് കൈവശമുള്ള താരമാണ് ബൂമ്രയെന്നും ഇത് മനസിലാക്കുകയെന്നത് ബാറ്റ്സ്മാനെ സംബന്ധിച്ചിടത്തോളം ദുഷ്കരമാണെന്നും സെയ്ഫെര്ട്ട് പറഞ്ഞു.
ആദ്യ കളിയില് ബൂമ്ര നിരവധി സ്ളോ ബോളുകള് എറിഞ്ഞിരുന്നു. സാധാരണയായി ഡെത്ത് ബൗളര്മാര് സ്ട്രെയ്റ്റ് ലൈനിലും അതോടൊപ്പം യോര്ക്കറുകളുമാണ് കൂടുതല് എറിയാറുള്ളതെന്നും എന്നാല് ബൂമ്ര അവരില് നിന്നു വ്യത്യസ്നാണെന്നും താരം പറഞ്ഞു. സാഹചര്യങ്ങളുമായി വേഗത്തില് പൊരുത്തപ്പെടുന്നത് എങ്ങനെയെന്നു ന്യൂസിലന്ഡ് ഇന്ത്യയെ കണ്ടു പഠിക്കണമെന്നും അദ്ദേഹം പറഞ്ഞു.
ന്യൂസിലന്ഡില് നടക്കുന്ന ട്വന്റി20 പരമ്പരയില് മികച്ച പ്രകടനമാണ് ബൂമ്ര കാഴ്ചവെക്കുന്നത്. ആദ്യ രണ്ട് മത്സരങ്ങളില് നിന്നും രണ്ട് വിക്കറ്റുകള് മാത്രമേ സ്വന്തമാക്കാന് കഴിഞ്ഞിരുന്നുള്ളൂ എങ്കിലും കീവീസ് ബാറ്റ്സ്മാന്മാരെ റണ്സ് സ്കോര് ചെയ്യാന് അനുവദിക്കാതെ ബൂമ്ര പിടിച്ചുകെട്ടിയിരുന്നു. ആദ്യ മത്സരത്തില് കീവീസ് 200നു മുകളില് സ്കോര് ചെയ്തപ്പോഴും ബൂമ്ര വഴങ്ങിയത് 4 ഓവറില് 31 റണ്സ് മാത്രമായിരുന്നു. രണ്ടാം മത്സരത്തില് അദ്ദേഹം 4 ഓവറില് വിട്ടുകൊടുത്തത് 21 റണ്സ് മാത്രമാണ്.
