ഹാമില്ട്ടണ്: ഇന്ത്യ-ന്യൂസിലന്ഡ് പരമ്പരയിലെ നിര്ണായകമായ മൂന്നാം മത്സരം ഇന്ന് ഹാമില്ട്ടണില് നടക്കും. ഇന്നത്തെ മത്സരം കൂടി വിജയിച്ചാല് ഇന്ത്യക്ക് പരമ്പര സ്വന്തമാക്കാം. അതേസമയം, സ്വന്തം കാണികള്ക്കു മുന്നില് മത്സരം വിജയിച്ച് പരമ്പരയിലേക്ക് തിരിച്ചുവരവ് നടത്താനാകും ന്യൂസിലന്ഡിന്റെ ശ്രമം. നിലവില് അഞ്ച് മത്സരങ്ങളുടെ പരമ്പരയില് ഇന്ത്യ 2-0ന് മുന്നിലാണ്.
ആദ്യ മത്സരത്തില് ബാറ്റ്സ്മാന്മാരുടെ മികവില് ന്യൂസിലന്ഡ് ഉയര്ത്തിയ കൂറ്റന് റണ്മല കീഴടക്കിയാണ് ഇന്ത്യ വരവറിയിച്ചതെങ്കില് രണ്ടാം മത്സരം ബൗളര്മാരുടെ മികവിലാണ് അറിയപ്പെട്ടത്. ആദ്യ രണ്ട് മത്സരങ്ങളിലും ഇന്ത്യയുടെ മുന്നില് ആതിഥേയര്ക്ക് മറുപടിയുണ്ടായിരുന്നില്ല. രണ്ട് മത്സരത്തിലും അര്ദ്ധ സെഞ്ച്വറിയടിച്ച ഓപ്പണര് ലോകേഷ് രാഹുലിന്റെ ഫോമാണ് ഇന്ത്യക്ക് പ്രതീക്ഷ നല്കുന്നത്. നാലാം നമ്പറില് യുവതാരം ശ്രേയസ് അയ്യരും മികച്ച പ്രകടനമാണ് പുറത്തെടുത്തത്.
ബൗളിംഗ് നിരയെ ആദ്യ മത്സരത്തില് കീവീസ് ബാറ്റ്സ്മാന്മാര് പരീക്ഷിച്ചെങ്കിലും രണ്ടാം മത്സരത്തില് ഇന്ത്യന് ബൗളര്മാരെ നേരിടാന് ബുദ്ധിമുട്ടുന്ന ന്യൂസിലന്ഡ് ബാറ്റ്സ്മാന്മാരെയാണ് കാണാനായത്. ആദ്യ മത്സരത്തില് 204 റണ്സ് നേടിയ കീവീസിന് രണ്ടാം മത്സരത്തില് വെറും 132 റണ്സ് നേടാനെ കഴിഞ്ഞുള്ളൂ. രണ്ട് മത്സരത്തില് നിന്നും രണ്ട് വിക്കറ്റുകള് മാത്രം നേടാനെ സാധിച്ചുള്ളു എങ്കിലും പേസര് ജസ്പ്രീത് ബൂമ്ര റണ്സ് വിട്ടുകൊടുക്കാന് പിശുക്കു കാണിക്കുന്നതാണ് ന്യൂസിലന്ഡിന് തലവേദനയാകുന്നത്.