ഹാമില്ട്ടണ്: നിര്ണായകമായ മൂന്നാം പരമ്പരയും വിജയിച്ച് ന്യൂസിലന്ഡില് ചരിത്രം കുറിച്ചിരിക്കുകയാണ് ടീം ഇന്ത്യ. ആവേശം വാനോളമുയര്ത്തിയ മത്സരത്തില് ഇഞ്ചോടിഞ്ച് പോരാട്ടത്തിനൊടുവിലാണ് ഇന്ത്യ വിജയം സ്വന്തമാക്കിയത്. നിശ്ചിത 20 ഓവറും കഴിഞ്ഞ് സൂപ്പര് ഓവറിലേക്ക് നീങ്ങിയ മത്സരത്തില് രോഹിത് ശര്മ്മയുടെ തുടര്ച്ചയായ രണ്ട് സിക്സറുകളിലൂടെയാണ് ഇന്ത്യ കീവീസിനെ മറികടന്നത്.
മത്സരത്തിനു പിന്നാലെ രോഹിത് ശര്മ്മയെ പ്രശംസിച്ച് നിരവധിയാളുകള് രംഗത്തു വന്നിരുന്നു. എന്നാല് തന്റെ സിക്സറുകളല്ല മത്സരം വിജയിക്കാന് കാരണമെന്നാണ് രോഹിത് പറയുന്നത്. തന്റെ സിക്സറുകളല്ല, 9 റണ്സ് പ്രതിരോധിച്ച് ഷമി എറിഞ്ഞ അവസാന ഓവറാണ് വിജയം നേടിത്തന്നതെന്നും മഞ്ഞ് വീഴുന്ന സാഹചര്യത്തില് അതൊട്ടും എളുപ്പമല്ലെന്നും രോഹിത് പറഞ്ഞു. ക്രീസില് ഒരറ്റത്ത് 95 റണ്സെടുത്ത് ബാറ്റിംഗ് തുടരുന്നയാളും മറ്റേ അറ്റത്ത് അത്രയും അനുഭവസമ്പത്തുള്ള ഒരാളുമാണുണ്ടായിരുന്നത്. ആ ഓവര് നന്നായെറിഞ്ഞ് തങ്ങളെ മത്സരത്തിലേക്ക് തിരികെ കൊണ്ടുവന്ന ഷമിക്ക് രോഹിത് അഭിനന്ദനങ്ങളും അറിയിച്ചു.
നിശ്ചിത 20 ഓവറില് 179 റണ്സാണ് ഇന്ത്യ നേടിയത്. മറുപടി ബാറ്റിംഗില് അവസാന ഓവറില് കീവീസിനു വേണ്ടിയിരുന്നത് വെറും 9 റണ്സായിരുന്നു. തകര്പ്പന് ഫോമില് നായകന് കെയ്ന് വില്യംസണും പരിചയ സമ്പന്നനായ റോസ് ടെയ്ലറുമായിരുന്നു ക്രീസില്. ആദ്യ പന്തില് തന്നെ ടെയ്ലര് സിക്സര് പറത്തി. വിജയ ലക്ഷ്യം 5 പന്തില് മൂന്ന് റണ്സ്. രണ്ടാം പന്തില് സിംഗിള് വഴങ്ങിയെങ്കിലും തൊട്ടടുത്ത പന്തില് വില്യംസണെയും അവസാന പന്തില് ടെയ്ലറേയും പുറത്താക്കിയ ഷമി മത്സരം സമനിലയില് എത്തിക്കുകയായിരുന്നു.
