സിഡ്‌നി: ഓസ്‌ട്രേലിയ ലോകക്രിക്കറ്റിന് സംഭാവനചെയ്തിരിക്കുന്ന യുവതാരത്തെ പ്രശംസിച്ച് ക്രിക്കറ്റ് ഇതിഹാസം സച്ചിന്‍ രംഗത്ത്. ഓസ്‌ട്രേലിയയുടെ ലബുഷാനെയെയാണ് സച്ചിന്‍ വാനോളം പുകഴ്‌ത്തിയത്. 2019ലെ മാത്രം പ്രകടനംവച്ച് ഇന്ന് ലോകക്രിക്കറ്റിലെ ഏറ്റവും പ്രത്യേകത നിറഞ്ഞ ബാറ്റ്‌സ്മാനാണ് ലബുഷാനെയെന്നാണ് സച്ചിന്‍ വിലയിരുത്തുന്നത്.
പാകിസ്താനെതിരേയും ന്യൂസിലാന്റിനെതിരേയും സ്വന്തം നാട്ടില്‍ മാത്രം ലബുഷാനെ നേടിയത് 896 റണ്‍സാണ്. ഇംഗ്ലണ്ടിനെതിരായ ആഷ്‌സ് പരമ്പരയിലെ രണ്ടാം ടെസ്റ്റില്‍ സ്റ്റീവ് സ്മിത്തിന് പകരക്കാരനായി ലബുഷാനെ വന്ന മത്സരത്തെ വിലയിരുത്തിയാണ് സച്ചിന്‍ ലബുഷാനെയുടെ പ്രതിഭയെ വിലയിരുത്തിയത്.
‘ഇംഗ്ലണ്ടിനെതിരെയുള്ള മത്സരം താന്‍ കണ്ടു. സ്റ്റീവിന്റെ പകരക്കാരനായി ലബുഷാനെ ബാറ്റിംഗിനിറങ്ങുന്നു. രണ്ടാം ഇന്നിംഗ്‌സിലെ ലബുഷാനെയുടെ ബാറ്റിംഗ് ലോക നിലവാരമാണ് കാണിച്ചത്. ആര്‍ച്ചറുകളുടെ പന്തുകളെയാണ് ലബുഷാനെ നേരിട്ടത്. ആ 15 മിനിറ്റുകള്‍ അക്ഷരാര്‍ത്ഥത്തില്‍ ഒരു ബാറ്റിംഗ് വിരുന്നായിരുന്നു. ഈ താരം ഒരു സംഭവമാണ്’ സച്ചിന്‍ പറഞ്ഞു.
ഓരോ പന്തും ആ താരം കളിക്കുന്ന രീതി എന്നെ അത്ഭുതപ്പെടുത്തി. പ്രത്യേകിച്ച് കാലുകളുടെ ചലനങ്ങള്‍. നല്ല മന: സാന്നിധ്യമുള്ളയൊരാള്‍ക്ക് മാത്രമേ ഇത്ര ഭംഗിയായി കളിക്കാനാകൂ. ഏതു നിലക്കും ലബുഷാനെയെ പ്രശംസിക്കാതെ നിവര്‍ത്തിയില്ലെന്ന് സച്ചിന്‍ പറയുന്നു.
