ഓക്ലന്ഡ്: ഇന്ത്യ-ന്യൂസിലന്ഡ് ഏകദിന പരമ്പരയിലെ രണ്ടാം ഏകദിനം നാളെ ഓക്ലന്ഡിലെ ഈഡന് പാര്ക്കില് നടക്കും. ഇന്ത്യന് സമയം രാവിലെ 7.30നാണ് മത്സരം. ആദ്യ മത്സരത്തില് പരാജയപ്പെട്ട ടീം ഇന്ത്യക്ക് നാളത്തെ മത്സരം നിര്ണായകമാണ്.
കഴിഞ്ഞ മത്സരത്തില് മികച്ച ബാറ്റിംഗ് പുറത്തെടുത്തെങ്കിലും ബൗളര്മാരുടെ പ്രകടനമാണ് ഇന്ത്യക്ക് തിരിച്ചടിയായത്. ഇതോടെ ടീമില് ചില മാറ്റങ്ങളുണ്ടാക്കേുമെന്നാണ് റിപ്പോര്ട്ട്. കുല്ദീപ് യാദവും ശര്ദൂല് താക്കൂറും മോശം പ്രകടനമാണ് പുറത്തെടുത്തത്. കുല്ദീപ് 10 ഓവറില് 84 റണ്സ് വഴങ്ങിയപ്പോള് താക്കൂര് 9 ഓവറില് 80 റണ്സാണ് വിട്ടു നല്കിയത്. കുല്ദീപിനെ മാറ്റി യുസ്വേന്ദ്ര ചഹലിനെ പരീക്ഷിക്കാനും സാധ്യതയുണ്ട്. കേദാര് ജാദവിനു പകരം ചഹലോ മനീഷ് പാണ്ഡയോ എത്തിയേക്കും. കുല്ദീപിനൊപ്പം ചഹലിനെ പരീക്ഷിക്കണമെന്ന് മുതിര്ന്ന താരങ്ങളും അഭിപ്രായപ്പെട്ടിരുന്നു.
ആദ്യ മത്സരത്തില് ഇന്ത്യ ഉയര്ത്തിയ 348 റണ്സിന്റെ കൂറ്റന് വിജയലക്ഷ്യം ന്യൂസിലന്ഡ് 6 വിക്കറ്റ് നഷ്ടത്തിലാണ് മറികടന്നത്. റോസ് ടെയ്ലര് പുറത്താകാതെ നേടിയ സെഞ്ച്വറിയാണ് ന്യൂസിലന്ഡിന്റെ വിജയത്തില് നിര്ണായകമായത്. മൂന്ന് മത്സരങ്ങളടങ്ങിയ പരമ്പരയില് ന്യൂസിലന്ഡ് 1-0ന് മുന്നിലാണ്. നാളത്തെ മത്സരം വിജയിച്ച് പരമ്പരയില് തിരിച്ചു വരവ് നടത്താന് ടീം ഇന്ത്യയും ജയത്തോടെ പരമ്പര സ്വന്തമാക്കാന് കീവീസും ഇറങ്ങുമ്പോള് വാശിയേറിയ മത്സരത്തിനാകും ഓക്ലന്ഡ് വേദിയാകുക.
