മെല്‍ബണ്‍: ക്രിക്കറ്റ് ഇതിഹാസം സച്ചിന്‍ ടെണ്ടുല്‍ക്കര്‍ വീണ്ടും കളത്തിലിറങ്ങുന്നു. ഓസ്ട്രേലിയയില്‍ പടര്‍ന്ന കാട്ടുതീയില്‍ ദുരിതം നേരിടുന്നവരെ സഹായിക്കാനായി സംഘടിപ്പിക്കുന്ന മത്സരത്തിലാണ് സച്ചിന്‍ ബാറ്റ് ചെയ്യുക. ഓസ്ട്രേലിയന്‍ വനിതാ ടീം അംഗമായ എല്ലിസ് പെറിയുടെ വെല്ലുവിളി സ്വീകരിച്ചാണ് സച്ചിന്‍ കളിക്കളത്തിലിറങ്ങുന്നത്. നാളെ മെല്‍ബണിലാണ് മത്സരം.
ബുഷ്ഫയര്‍ ക്രിക്കറ്റ് ബാഷ് ക്ലാഷ് എന്ന് പേരിട്ടിരിക്കുന്ന പ്രദര്‍ശന മത്സരത്തില്‍ പോണ്ടിംഗ് ഇലവനും ഗില്‍ക്രിസ്റ്റ് ഇലവനും തമ്മിലാണ് ഏറ്റുമുട്ടുക. ഇതില്‍ പോണ്ടിംഗ് ഇലവന്റെ പരിശീലകനായാണ് സച്ചിന്‍ എത്തുകയെന്ന് നേരത്തെ അറിയിച്ചിരുന്നു. എന്നാല്‍ ഇന്നിംഗ്‌സിന്റെ ഇടവേളയില്‍ ഒരോവര്‍ ബാറ്റ് ചെയ്യാന്‍ തയ്യാറാവുമോ എന്ന് എല്ലിസ് പെറി ചോദിച്ചതോടെയാണ് ഒരു കൈ നോക്കാന്‍ സച്ചിനും തീരുമാനിച്ചത്.
തോളെല്ലിലെ പരിക്ക് കാരണം തന്നോട് ബാറ്റ് ചെയ്യരുതെന്ന് ഡോക്ടര്‍ നിര്‍ദേശിച്ചിട്ടുണ്ടെന്ന് സച്ചിന്‍ പറഞ്ഞു. എങ്കിലും എല്ലിസിന്റെ വെല്ലുവിളി സ്വീകരിക്കുന്നുവെന്നും ഇതിലൂടെ പരമാവധി പണം സമാഹരിക്കാനാകുമെന്നാണ് പ്രതീക്ഷയെന്നും സച്ചിന്‍ വ്യക്തമാക്കി. ടി10 മത്സരത്തില്‍ സച്ചിനു പുറമെ യുവരാജ് സിംഗ്, ബ്രയാന്‍ ലാറ, വസിം അക്രം, കോട്നി വാല്‍ഷ, ബ്രറ്റ് ലീ എന്നിവരും പാഡണിയും.
