വീണ്ടും പാഡണിഞ്ഞ് സച്ചിന്‍; നേരിട്ട ആദ്യ പന്ത് തന്നെ ബൗണ്ടറി കടത്തി; വീഡിയോ കാണാം

മെല്‍ബണ്‍: ഓസ്‌ട്രേലിയയില്‍ പടര്‍ന്ന കാട്ടുതീ ദുരിത ബാധിതര്‍ക്ക് ധനസമാഹരണം നടത്താനായി സംഘടിപ്പിച്ച ക്രിക്കറ്റ് മത്സരത്തില്‍ കളിക്കളത്തിലേക്ക് തിരിച്ചു വരവ് നടത്തി ക്രിക്കറ്റ് ഇതിഹാസം സച്ചിന്‍ ടെണ്ടുല്‍ക്കര്‍. ആറ് പന്തുകള്‍ നേരിട്ട മാസ്റ്റര്‍ ബ്ലാസ്റ്റര്‍ ആദ്യ പന്ത് തന്നെ ബൗണ്ടറി കടത്തിയാണ് ‘തിരിച്ചു വരവ്’ ആഘോഷമാക്കിയത്.

ഓസീസ് വനിതാ ക്രിക്കറ്റ് ടീമിലെ ഓള്‍ റൗണ്ടറായ എല്ലിസ് പെറിയുടെ ആദ്യ പന്ത് തന്നെ സച്ചിന്റെ പാഡിനെ ലക്ഷ്യമാക്കിയാണ് എത്തിയത്. എന്നാല്‍ വളരെ അനായാസം അദ്ദേഹം ഒരു ഫ്‌ളിക്കിലൂടെ പന്ത് ബൗണ്ടറി കടത്തി. പിന്നീടുള്ള പന്തുകള്‍ പ്രതിരോധിച്ചു കളിച്ച സച്ചിനെതിരെ അവസാന രണ്ട് ബോളുകള്‍ ചെയ്തത് ഓസീസ് കൗമാര താരം അനബെല്‍ സതര്‍ലാന്‍ഡായിരുന്നു. മത്സരത്തിനിടെ ഇന്നിംഗ്‌സിന്റെ ഇടവേളയിലായിരുന്നു സച്ചിന്റെ ബാറ്റിംഗ്.

Sachin is off the mark with a boundary!https://t.co/HgP8Vhnk9s #BigAppeal pic.twitter.com/4ZJNQoQ1iQ

— cricket.com.au (@cricketcomau) February 9, 2020

അതേസമയം, പോണ്ടിംഗ് XIനും ഗില്‍ക്രിസ്റ്റ് XIനും തമ്മില്‍ നടന്ന മത്സരത്തില്‍ പോണ്ടിംഗ് XIന്‍ 1 റണ്ണിന് വിജയിച്ചു. പോണ്ടിംഗ് XIന്റെ പരിശീലകനായാണ് സച്ചിന്‍ ഓസ്‌ട്രേലിയയില്‍ എത്തിയത്. എന്നാല്‍ ഇന്നിംഗ്സിന്റെ ഇടവേളയില്‍ ഒരോവര്‍ ബാറ്റ് ചെയ്യാന്‍ തയ്യാറാവുമോ എന്ന് ഓസീസ് വനിത ക്രിക്കറ്റ് താരം എല്ലിസ് പെറി ചോദിച്ചതോടെയാണ് ഒരു കൈ നോക്കാന്‍ സച്ചിനും തീരുമാനിച്ചത്. തോളെല്ലിലെ പരിക്ക് കാരണം തന്നോട് ബാറ്റ് ചെയ്യരുതെന്ന് ഡോക്ടര്‍ നിര്‍ദേശിച്ചിട്ടുണ്ടെന്ന് സച്ചിന്‍ പറഞ്ഞു. എങ്കിലും എല്ലിസിന്റെ വെല്ലുവിളി സ്വീകരിക്കുന്നുവെന്നും ഇതിലൂടെ പരമാവധി പണം സമാഹരിക്കാനാകുമെന്നാണ് പ്രതീക്ഷയെന്നും സച്ചിന്‍ ട്വിറ്ററിലൂടെ അറിയിച്ചിരുന്നു.