സെഞ്ച്വറിയുടെ എണ്ണം കണക്കാക്കി കൊറോണ പ്രതിരോധ നിധി: ഗവാസ്‌ക്കറുടെ സംഭാവനയെ വിശദീകരിച്ച് മകന്‍

മുംബൈ: കൊറോണ ദുരിതാശ്വാസ പ്രവര്‍ത്തനത്തിന്റെ ഭാഗമായി വലിയതുക സംഭാവന ചെയ്ത് മുന്‍ ക്രിക്കറ്റ് ടീം ക്യാപ്റ്റന്‍ സുനില്‍ ഗവാസ്‌ക്കര്‍ ശ്രദ്ധ നേടി. എന്നാല്‍ 59 ലക്ഷം എന്ന തുക സംഭാവന ചെയ്ത രീതിയെ മകന്‍ വിശദീകരിച്ചതാണ് വാര്‍ത്തയായിരിക്കുന്നത്.

മറ്റെല്ലാ ക്രിക്കറ്റ് താരങ്ങള്‍ക്കുമൊപ്പം കഴിഞ്ഞയാഴ്ച തന്നെ ഗവാസ്‌ക്കര്‍ കൊറോണ പ്രതിരോധ നിധി നല്‍കിയിരുന്നു. 59 ലക്ഷമാണ് സംഭാവനയെന്ന വിവരം മുംബൈയുടെ ബാറ്റ്‌സ്മാനായ അമോല്‍ മജൂംദാറാണ് സമൂഹമാദ്ധ്യമങ്ങളിലൂടെ അറിയിച്ചത്. അതില്‍ എന്തുകൊണ്ടാണ് 59 ലക്ഷമായതെന്ന കൗതുകമുണര്‍ത്തിയ ചോദ്യമാണ് പിന്നീട് സമൂഹമാദ്ധ്യമങ്ങളില്‍ നിറഞ്ഞത്. ഉത്തരം നല്‍കിയത് ക്രിക്കറ്റ് താരം കൂടിയായ മകന്‍ രോഹനായിരുന്നു.

തന്റെ അച്ഛന്‍ രണ്ടു ഘട്ടമായാണ് തുക നല്‍കിയത്. 35 ലക്ഷം പ്രധാനമന്ത്രിയുടെ പി.എം.കെയറിലേക്കും 24 ലക്ഷം മഹാരാഷ്‌ട്രാ സര്‍ക്കാറിനുമായിരുന്നുവെന്ന് രോഹന്‍ തുടക്കത്തിലേ വ്യക്തമാക്കി. അത് വിശദീകരിക്കവേയാണ് ക്രിക്കറ്റിലെ സെഞ്ച്വറികളുടെ കണക്ക് പുറത്തുവന്നത്.

🙏🏼- this was done last week . 35 because he scored 35 hundreds for India and 24 because he scored 24 for Mumbai . Prayers for everyone’s good health and that we are all safe and sound . 🙏🏼🙏🏼

— Rohan Gavaskar (@rohangava9) April 7, 2020

‘ഇതില്‍ 35 ലക്ഷം എന്നത് ഗവാസ്‌ക്കര്‍ അന്താരാഷ്‌ട്ര ക്രിക്കറ്റില്‍ ഇന്ത്യക്ക് വേണ്ടി നേടിയ സെഞ്ച്വറികളുടെ എണ്ണമാണ്. 24 എന്നത് മഹാരാഷ്‌ട്രയ്‌ക്ക് വേണ്ടി രഞ്ജി ട്രോഫിയില്‍ നേടിയ സെഞ്ച്വറിയുമാണ്’ ഗവാസ്‌ക്കറുടെ മകന്‍ രോഹന്‍ ട്വിറ്ററിലൂടെ കുറിച്ചു.