മിലാന്: കൊറോണ ഏറ്റവും ശക്തമായി ബാധിച്ചിട്ടും ഇറ്റലിയിലെ യുവതികള് അതിനേയും അതിജീവിക്കുകയാണ്. രണ്ടു യുവതികള് രണ്ടു വീടുകളുടെ ടെറസ്സില് നിന്നുകൊണ്ട് ടെന്നീസ് കളിക്കുന്ന വീഡിയോ ദൃശ്യമാണ് വൈറലാകുന്നത്.
കൊറോണ മാനദണ്ഡങ്ങള് പാലിച്ചുകൊണ്ട് നടത്തുന്ന ടെന്നീസെന്നാണ് അന്താരാഷ്ട്ര മാദ്ധ്യമങ്ങള് വീഡിയോ ഏറ്റെടുത്തുകൊണ്ട് വിശേഷിപ്പിച്ചത്. ‘ ഇവര് സാമൂഹിക അകലം കൃത്യമായി പാലിച്ചിരിക്കുന്നു. അതോടൊപ്പം വീട്ടിലടച്ചിടാതെ വ്യായാമം ഉറപ്പു വരുത്തിയിരിക്കുന്നു. ‘ മാദ്ധ്യമങ്ങള് അടിക്കുറിപ്പായി ഇറ്റലിയില് നിന്നുള്ള ദൃശ്യത്തെ ലോകത്തിന് മുമ്പാകെ എത്തിച്ചു.
രണ്ടു യുവതികളും അവരവരുടെ ടെറസ്സില് നിന്നുകൊണ്ടാണ് പരസ്പരം പന്തടിക്കുന്നത്. വീടുകള്ക്കിടയില് കുറഞ്ഞത് 10 മീറ്ററെങ്കിലും അകലമുണ്ട്. ഏതായാലും യുവതികളുടെ കായിക വിനോദം കൊറോണ കാലത്തെ ഏകാന്തതക്കിടയില് ലോകം മുഴുവനുള്ള കായികപ്രേമികള് ആവേശപൂര്വ്വം ഏറ്റെടുത്തു കഴിഞ്ഞു. കൊറോയുടെ ആദ്യഘട്ടത്തില് വീടുകളില് ഒറ്റപ്പെട്ടുപോയ കുടുംബാംഗങ്ങള് ഒരുമിച്ച് മട്ടുപ്പാവില് അണിനിരന്ന് ദേശീയഗാനമുള്പ്പടെ പാടി ലോക ശ്രദ്ധ ആദ്യം നേടിയതും ഇറ്റലിയായിരുന്നു.
