കറാച്ചി: പാക് അന്താരാഷ്ട്ര ക്രിക്കറ്റര് ഉമര് അക്മലിനെ പുറത്താക്കിയതിന് പിന്നാലെ പാകിസ്താന് ക്രിക്കറ്റ് ബോര്ഡിനെതിരെ ശക്തമായ ആരോപണങ്ങളുമായി മുന്കാല താരങ്ങള് രംഗത്ത്. അഴിമതിയില് മുങ്ങിക്കുളിച്ചവരെ സെലക്ഷന് കമ്മിറ്റിയിലും ഭരണസമിതിയിലും ഉള്പ്പെടുത്തിയതാണ് പാക് ക്രിക്കറ്റിനെ നശിപ്പിച്ചതെന്നാണ് ഭൂരിഭാഗം മുന്താരങ്ങളുടേയും അഭിപ്രായം. ഉമര് അക്മല് സ്വയം തന്റെ ഭാവി നശിപ്പിച്ചതാണെന്ന പ്രസ്താവന മുന് നായകന് അക്തര് പറഞ്ഞതിന് പിന്നാലെയാണ് റമീസ് രാജ രംഗത്തെത്തിയത്.
നിരന്തരം അഴിമതി ആരോപിക്കപ്പെട്ടവരെ സ്ഥിരം കമ്മിറ്റിയില് കയറ്റാന് തിടുക്കം കാണിക്കുന്ന നയം പാകിസ്താന് ക്രിക്കറ്റിനെ നശിപ്പിച്ചെന്നാണ് രാജ ആരോപിച്ചത്. പാക് ക്രിക്കറ്റ് അഴിമതി വീരന്മാരെ വില്പ്പനക്ക് വച്ചിരിക്കുന്ന സൂപ്പര്മാര്ക്കറ്റാണെന്ന പരിഹാസമാണ് റമീസ് രാജ നടത്തിയത്. ഏറെ നാളത്തെ പുറത്താക്കലും ജയില് ശിക്ഷയും കഴിഞ്ഞ മുഹമ്മദ് ആമിറിനെ ദേശീയ ടീമിലെടുത്ത നടപടിയെ രാജ വിമര്ശിച്ചു. വലിയ പേരെടുത്തവരുടെ പുറകേ പോകുന്ന പ്രവണത നിര്ത്തിയില്ലെങ്കില് പാകിസ്താന് അന്താരാഷ്ട്ര ക്രിക്കറ്റില് ഒന്നുമല്ലാതാകുമെന്ന മുന്നറിയിപ്പും രാജ നല്കി. നിലവിലെ താരങ്ങളില് ലോക ക്രിക്കറ്റിലെ ഏറ്റവും മികച്ച ബാറ്റ്സ്മാന്മാരായ കോഹ്ലിയേക്കാളും സ്മിത്തിനേക്കാളും മിടുക്കന് പാക് ഓപ്പണര് ബാബര് അസമാമെന്നും റമീസ് രാജ പറഞ്ഞു.
പാകിസ്താന്റെ പരിശീലക സ്ഥാനത്തേക്ക് മിസ്ബാ ഉള് ഹഖിനെ നിയമിച്ചതിനെതിരെ മുന് താരം മുഹമ്മദ് യൂസഫ് രംഗത്തെത്തി.പ്രാദേശിക തലത്തിലോ ക്ലബ്ബുകളിലോ പോലും പരിശീലകനാകാത്ത ഒരാളെ അന്താരാഷ്ട്ര ക്രിക്കറ്ററായിരുന്നു എന്ന പേരില് ദേശീയ ടീമിനെ പരിശീലിപ്പിക്കാന് നിയോഗിച്ചതിനെ കടുത്ത ഭാഷയിലാണ് മുന് നായകന് വിമര്ശിച്ചത്.