ലണ്ടന്: വനിത ലോകകപ്പ് അണ്ടര്-17 മത്സരങ്ങളുടെ സമയം മാറ്റി. ഇന്ത്യ ആതിഥ്യമരുളുന്ന ലോകകപ്പ് 2021 ഫെബ്രുവരി 17 നാണ് ആരംഭിക്കുകയെന്ന് ഫിഫ അറിയിച്ചു. ഈ വര്ഷം നവംബര് 2 മുതല് 21 വരെയാണ് ആദ്യം നടത്താന് നിശ്ചയിച്ചിരുന്നത്. കൊറോണ ബാധയില് ലോക കായികരംഗത്തെ എല്ലാ മത്സരങ്ങളും മാറ്റിവയ്ക്കേണ്ട സാഹചര്യം കണക്കിലെടുത്താണ് സമയമാറ്റമെന്ന് ഫിഫ അറിയിച്ചു.
നിലവിലെ അണ്ടര്-17 മത്സരങ്ങള്ക്കായി അതാതു രാജ്യങ്ങള് നിശ്ചയിച്ച ടീമുകളും കളിക്കാരും അടുത്ത വര്ഷവും കളിക്കുമെന്നും ഫിഫ അറിയിച്ചു. ഒരു വര്ഷം മുന്നോട്ടാക്കിയതുമൂലമുണ്ടാകുന്ന പ്രായവ്യത്യാസം 2021ലെ മത്സരത്തിന് ബാധകമാകില്ലെന്നും ഫിഫ അറിയിച്ചു.
ആതിഥേയരായ ഇന്ത്യ ഗ്രൂപ്പ് ഏയിലെ ആദ്യ ടീമായി സ്ഥാനം പിടിച്ചിട്ടുണ്ട്. മറ്റ് ടീമുകള് പ്രഖ്യാപിക്കപ്പെട്ടിട്ടില്ല. ഗുവാഹട്ടി, ഭുവനേശ്വര്, അഹമ്മദാബാദ്, കൊല്ക്കത്ത, മുംബൈ എന്നിവിടങ്ങളിലായിട്ടാണ് മത്സരം നടക്കുക. ഏഷ്യ, ആഫ്രിക്ക, വടക്കന് അമേരിക്ക, ദക്ഷിണ അമേരിക്ക, യൂറോപ്പ് എന്നിവിടങ്ങളിലെ മൂന്ന് ടീമുകള് വീതവും ഓഷ്യാനയിലെ ഒരു ടീമുമാണ് കളിക്കുക. ഏഷ്യയിലെ ടീമില് ഇന്ത്യയെക്കൂടാതെ ജപ്പാനും വടക്കന് കൊറിയയുമാണ് മാറ്റുരയക്കുന്നത്. നിലവിലെ ചാമ്പ്യന് വടക്കന് കൊറിയയാണ്.