ലാഹോര്‍: പാകിസ്ഥാന്‍ ക്രിക്കറ്റില്‍ നായകമാറ്റം. ബാറ്റിംഗിലെ കരുത്തനായ ബാബര്‍ അസമിനെ പുതിയ നായകനായി പ്രഖ്യാപിച്ചു. ഇതോടൊപ്പം ഹൈ പെര്‍ഫോര്‍മന്‍സ് കമ്മിറ്റി തലവനായി മുന്‍ അന്താരാഷ്‌ട്ര താരവും മികച്ച സ്പിന്‍ ബൗളറുമായിരുന്ന നദീം ഖാനെയും നിയമിച്ചു.
25കാരനായ ബാബര്‍ അസം നിലവില്‍ അന്തരാഷ്‌ട്ര ക്രിക്കറ്റിലെ ഏറ്റവും മികച്ച ബാറ്റ്‌സ്മാന്‍ മാരിലൊരാളായി പേരെടുത്തു കഴിഞ്ഞു. ഏകദിന, ടി20 ടീമിനെയാണ് ബാബര്‍ നയിക്കുക. ടെസ്റ്റ് ടീമിന്റെ നായകനായി അസ്ഹര്‍ അലി തന്നെ തുടരും.
പൊതു അപേക്ഷ ക്ഷണിച്ചതിലെ 16 പേരില്‍ നിന്നാണ് നദീമിനെ തിരഞ്ഞെടുത്തതെന്ന് ക്രിക്കറ്റ് കമ്മിറ്റി ചെയര്‍മാന്‍ ഇഖ്ബാല്‍ ഖ്വാസിം പറഞ്ഞു. കമ്മിറ്റിയില്‍ വസിം അക്രം, ഇംഗ്ലീഷ് ക്രിക്കറ്റ് ബോര്‍ഡ് മുന്‍ അംഗം ഡേവിഡ് പാഴ്‌സണ്‍, വസീം ഖാന്‍ എന്നിവര്‍ യോഗത്തില്‍ സന്നിഹിതരായിരുന്നു.
ക്രിക്കറ്റ് അക്കാദമിയുടെ നവീകരണത്തിനാണ് പുതിയ ചുമതല പ്രഖ്യാപിച്ചിരിക്കുന്നത്. ഇതോടെ അക്കാദമിയുടെ ചുമതല വഹിക്കുന്ന മുന്‍ താരം മുദ്ദസര്‍ നാസര്‍, പ്രാദേശിക ക്രിക്കറ്റിന്റെ ചുമതല വഹിക്കുന്ന ഹറൂണ്‍ റഷീദ് എന്നിവരുടെ ചുമതല തീരുന്ന മെയ് 31 ന് ശേഷം നദീം ഖാന്‍ പൂര്‍ണ്ണ ചുമതല ഏറ്റെടുക്കുമെന്ന് പാകിസ്താന്‍ ക്രിക്കറ്റ് ബോര്‍ഡ് വ്യക്തമാക്കി.
ക്രിക്കറ്റ് ബോര്‍ഡിന്റേയും മറ്റ് എല്ലാ ഡിപ്പാര്‍ട്ടുമെന്റുകളുടേയും നടത്തിപ്പു ചുമതല നദീം ഖാന്‍ ഇനി നിര്‍വ്വഹിക്കണം. നിലവില്‍ പുരുഷ ടീമിനെ തിരഞ്ഞെടുക്കുന്ന കമ്മിറ്റിയുടെ സംയോജകനായിരുന്നു നദീം. 50 വയസ്സുകാരനായ നദീം 1986ലാണ് പ്രാദേശിക ക്രിക്കറ്റിലെത്തിയത്. തന്റെ ടെസ്റ്റ് കരിയറില്‍ ബ്രയാന്‍ ലാറയുടേയും സച്ചിന്റേയും വിക്കറ്റുകള്‍ വീഴ്‌ത്താനായതാണ് ഏറ്റവും വലിയ നേട്ടമായി നദീം മനസ്സില്‍ സൂക്ഷിക്കുന്നത്.
