ന്യൂഡല്ഹി: അന്താരാഷ്ട്ര നിയമങ്ങള് മറികടന്നുള്ള ചൈനയുടെ നീക്കങ്ങളെപ്പറ്റി രഹസ്യാ ന്വേഷണ വിഭാഗം കേന്ദ്രസര്ക്കാറിന് റിപ്പോര്ട്ട് സമര്പ്പിച്ചു. ലഡാക് മേഖലയില് ചൈന നടത്തിക്കൊണ്ടിരിക്കുന്ന അനധികൃത നിര്മ്മാണങ്ങളുടെ വിശദമായ വിവരങ്ങളാണ് റിപ്പോര്ട്ടിലുള്ളത്. കിഴക്കന് ലഡാക്കിലേക്ക് സൈനികരെ എത്തിക്കാനായി ചൈന നടത്തുന്ന നിര്മ്മാണ പ്രവര്ത്തനങ്ങളുടെ വിവരങ്ങള് റിപ്പോര്ട്ടില് ഉള്പ്പെട്ടിട്ടുണ്ട്.
ലഡാക്കിലെ തന്ത്രപ്രധാനമായ ദോലത് ബെഗ് ഒല്ദി മേഖലയിലും പാന്ഗോംഗ് സോ മേഖലയിലുമാണ് ചൈനയുടെ അനധികൃതമായ കയ്യേറ്റവും നിര്മ്മാണവും നടക്കുന്നത്. നിയന്ത്രണരേഖാ പ്രദേശമായതിനാല് ഇരുകൂട്ടരും വിട്ടുനില്ക്കേണ്ട പ്രദേശത്തേക്ക് ചൈന കടന്നുകയറുകയാണെന്നും റിപ്പോര്ട്ടില് പറയുന്നു.
ജൂണ് 6ന് ഇരുഭാഗത്തേയും സൈനിക ഉദ്യോഗസ്ഥന്മാര് നടത്താനിരിക്കുന്ന യോഗത്തില് നിര്മ്മാണ പ്രവര്ത്തനങ്ങള് ചര്ച്ചയാകുമെന്നാണ് സൂചന. അനധികൃതമായി ചൈന മുന്നേറ്റം നടത്തിയിരിക്കുന്ന സ്ഥലങ്ങളില് നിന്നും തിരികെപോകണമെന്ന നിര്ദ്ദേശവും ഇന്ത്യ മുന്നോട്ട് വയ്ക്കുമെന്നാണ് സൂചന.