ലണ്ടന്: കൊറോണ ലോക്ഡൗണിന് ശേഷം നടന്ന ആദ്യ പ്രീമിയര് ലീഗ് മത്സരത്തില് മാഞ്ചസ്റ്റര് സിറ്റിക്ക് ജയം. ആദ്യ അഞ്ചിലേക്ക് മുന്നേറാനുള്ള ആഴ്സണലിന്റെ മോഹങ്ങളാണ് ലീഗിലെ രണ്ടാം സ്ഥാനക്കാര് കരിച്ചുകളഞ്ഞത്. എതിരില്ലാത്ത മൂന്നു ഗോളിനായി ആഴ്സണലിനെ സിറ്റി തകര്ത്തത്. രണ്ടാം മത്സരത്തില് ഷെഫ് യൂണൈറ്റഡിനെ ആസ്റ്റണ് വില്ല സമനിലയില് തളച്ചു.
ഇരുപകുതികളിലുമായാണ് സിറ്റി ഗോളടിച്ചത്. സ്റ്റെര്ലിംഗ് ആദ്യപകുതിയുടെ അധിക സമയത്ത് സിറ്റിക്കായി ആദ്യ ഗോള് നേടി. ഡീ ബ്രൂയിന് 51-ാം മിനിറ്റിലെ പെനാല്റ്റി ഗോളാക്കി. രണ്ടാം പകുതിയുടെ അധിക സമയത്ത് ഫോഡന് സിറ്റിക്കായി മൂന്നാം ഗോളും നേടി. 49-ാം മിനിറ്റില് ഡേവിഡ് ലൂയിസ് ചുവപ്പുകാര്ഡുകണ്ട് പുറത്തായതും ആഴ്സണലിന് വിനയായി. 29 മത്സരങ്ങളിലായി സിറ്റി 60 പോയിന്റുകളോടെ രണ്ടാം സ്ഥാനത്താണ്. ലീഗിലെ ഒന്നാം സ്ഥാനത്തുള്ള ലിവര്പൂള് 82 പോയിന്റോടെ ബഹുദൂരം മുന്നിലാണ്.
രണ്ടാം മത്സരത്തില് മികച്ച ജയം പ്രതിക്ഷിച്ച ഷെഫ് യൂണൈറ്റഡിനെ ആസ്റ്റണ് വില്ല സമനിലയില് കുരുക്കി. ഇരു ടീമുകള്ക്കും ഗോളടിക്കാനായില്ല. ഇതിനിടെ 41-ാം മിനിറ്റില് ഗോളുറപ്പിച്ച കിക്ക് റഫറി അനുവദിക്കാതിരുന്നത് ഷെഫ് യുണൈറ്റഡിന് ജയം നിഷേധിക്കുകയും ചെയ്തു.വില്ലയുടെ കീപ്പര് ഒറാന് നൈലാന്റ് ഷെഫ് യൂണൈറ്റഡിന്റെ ഒലിവര് നോര്വുഡിന്റെ കിക്ക് ഗോള്പോസ്റ്റിന് അകത്തു നിന്നാണ് പിടിച്ചതെന്ന വാദം റഫറി അംഗീകരിച്ചില്ല. നിലവില് ഷെഫ് 44 പോയിന്റുകളോടെ 6-ാം സ്ഥാനത്താണ്.
