മാഞ്ചസ്റ്റര്: കൊറോണ കാലത്തെ പ്രീമിയര് ലീഗ് മത്സരങ്ങളില് ഇന്ന് അഞ്ചു മത്സരങ്ങള്. മികച്ച അഞ്ചു ടീമുകളുടെ പോരാട്ടമാണ് കാണികളെ മാറ്റിനിര്ത്തിയുള്ള സ്റ്റേഡിയങ്ങളില് നടക്കുന്നത്. ലീഗ് വമ്പന്മാരായ ലിവര്പൂളും മാഞ്ചസ്റ്റര് യുണൈറ്റഡും ആസ്റ്റണ് വില്ലയും എവര്ട്ടണും ഇന്നിറങ്ങുകയാണ്. മറ്റ് മത്സരങ്ങളിലായി ഷെഫ് യുണൈറ്റഡ്, ന്യൂകാസില്, അട്ടിമറി ടീമായ വൂള്വ്സ്, ക്രിസ്റ്റല് പാലസ്, ബേണ്മൗത്ത്, നോര്വിച്ച് സിറ്റി എന്നിവരും മാറ്റുരയ്ക്കും.
ലീഗിലെ ആദ്യ പത്ത് സ്ഥാനങ്ങളില് നില്ക്കുന്ന ടീമുകളാണ് മാഞ്ചസ്റ്റര് യുണൈറ്റഡ്, വൂള്വ്സ്, ഷെഫ് യുണൈറ്റഡ്, ക്രിസ്ററല് പാലസ് എന്നിവര്. ഏറ്റവും അധികം തവണ ലീഗ് ചാമ്പ്യന്മാരായ മാഞ്ചസ്റ്റര് യുണൈറ്റഡിന് ഈ സീസണ് നിരാശയാണ് സമ്മാനിച്ചത്. നിലവില് ചെല്സിക്കും പുറകില് അഞ്ചാം സ്ഥാനത്താണ് യുണൈറ്റഡുള്ളത്. ഇന്ന് ഷെഫ് യുണൈറ്റഡാണ് എതിരാളി. പോഗ്ബയും റാഷ്ഫോഡും അടങ്ങുന്ന നിരയിലാണ് മാഞ്ചസ്റ്ററിന്റെ പ്രതീക്ഷ.
1990ന് ശേഷം കിരീടം നേടാത്ത ക്ഷീണം തീര്ക്കാനുള്ള മികച്ച മുന്നേറ്റത്തിലാണ് ലിവര്പൂള്. ക്രിസ്റ്റല് പാലസുമായിട്ടാണ് ഇന്നത്തെ മത്സരം. 30 മത്സരങ്ങള് പൂര്ത്തിയാക്കിയപ്പോള് 83 പോയിന്റുകളുമായി ഏറെ മുന്നിലാണ് ജുര്ഗന് ക്ലോപ്പിന്റെ ചുവപ്പന് പട. ഫിര്മിനോ, ഫാബിനോ, ഹെന്ഡേഴ്സണ്, ബ്രൂസ്റ്റര് എന്നിവരുടെ മികവിലാണ് ലിവര്പൂള് മുന്നേറ്റം തുടരുന്നത്. അലിസണ് ബെക്കറും ആഡ്രിയാനും ഗോള് കീപ്പര്മാരായി ടീമിലുണ്ട്.