മാഡ്രിഡ്: ആല്വെസിനെ എതിരില്ലാത്ത രണ്ടു ഗോളിന് തോല്പ്പിച്ച് റയല് മാഡ്രിഡ് ലീഗ് കിരീട പ്രതീക്ഷ നിലനിര്ത്തി. ഇരുപകുതികളിലുമായി നേടിയ ഗോളുകള്ക്കാണ് ആല്വസിനെ റയല് പരാജയപ്പെടുത്തിയത്. 11-ാം മിനിറ്റില് ലഭിച്ച പെനാല്റ്റി കരീം ബെന്സേമയാണ് ഗോളാക്കിയത്. തുടര്ന്ന് റയലിനെതിരെ പ്രതിരോധം ശക്തമാക്കിയാണ് ആല്വെസ് നീങ്ങിയത്. ആദ്യ പകുതിയില് നേരിട്ട് ഗോളടിക്കാനുള്ള റയലിന്റെ എല്ലാ ശ്രമങ്ങളും ആല്വെസ് തടഞ്ഞു. എന്നാല് രണ്ടാം പകുതിയ്ല് റയല് നടത്തിയ അതിവേഗ നീക്കം ഫലം കണ്ടു 51-ാം മിനിറ്റില് മാര്കോ അസെന്സിയോയാണ് ജയം ആധികാരിക മാക്കിയ ഗോള് നേടിയത്. 35 കളികളിലായി റയലിന് 80 പോയന്റും ബാഴ്സലോണയ്ക്ക് 35 കളികളിലായി 76 പോയിന്റുമാണുള്ളത്. 7 മത്സരങ്ങള് തുടര്ച്ചയായി ജയിച്ചാണ് റയല് മുന്നേറുന്നത്.
ഇനി രണ്ടു മത്സരങ്ങള് ബാക്കി നില്ക്കേ തൊട്ടടുത്ത എതിരാളി ബാഴ്സലോണയേക്കാല് 4 പോയിന്റുകള് മുന്നിലാണ് റയല്. വല്ലാഡോലിഡുമായിട്ട് ഇന്ന് ബാഴ്സലോണ കളിക്കാനിറങ്ങുകയാണ്. ഇന്ന് നടക്കുന്ന മത്സരത്തില് ബാഴ്സയ്ക്ക് മികച്ച ഗോള് ശരാശരിയോടെയുള്ള തകര്പ്പന് ജയം അനിവാര്യമാണ്. വരാനിരിക്കുന്ന എല്ലാ കളികളും ജയിക്കുകയും വേണം. റയല് ഏതെങ്കിലും കളിയില് തോല്ക്കുകയോ സമനില വഴങ്ങേണ്ടിവന്നാലും ബാഴ്സയ്ക്ക് സാധ്യതകൂടും. നിലവില് എതിരാളികള്ക്ക് നേരെ ഗോളുകളടിച്ച എണ്ണത്തില് ബാഴ്സലോണയാണ് മുന്നില്.15 ഗോളുകള് റയലിനേക്കാള് കൂടുതലാണ് ബാഴ്സയുടെ പേരിലുള്ളത്.
