കാന്പൂര്: വികാസ് ദുബെ കൊലപ്പെടുത്തിയ പോലീസുകാരുടെ പോസ്റ്റ്മാര്ട്ടം റിപ്പോര്ട്ട് പുറത്തുവന്നു. അതിക്രൂരമായാണ് പോലീസുദ്യോഗസ്ഥരെ കൊലപ്പെടുത്തിയതെന്നാണ് പോസ്റ്റ് മാര്ട്ടം റിപ്പോര്ട്ടില് പറയുന്നത്. എട്ടു പോലീസുദ്യോഗസ്ഥരേയും വെടിവെച്ചിട്ടശേഷം വെട്ടിയും കുത്തിയും മാരകമായിട്ടാണ് കൊലപ്പെടുത്തിയത്.
വികാസ് ദുബെയുടെ വീട്ടിലേയ്ക്ക് റെയ്ഡിന് പോയ പോലീസുകാരെ വളഞ്ഞിട്ട് ആക്രമിക്കുന്ന പ്രാകൃതമായ നടപടിയാണുണ്ടായതെന്ന് കാന്പൂര് പോലീസ് എസ്.പി.പറഞ്ഞു. കെട്ടിടങ്ങള്ക്ക് മുകളില് നിന്നും ദുബെയുടെ സഹായികളുടെ വെടിയേല്ക്കാതിരിക്കാന് മൂത്രപ്പുരയിലേക്ക് ഓടിക്കയറിയ അഞ്ചുപോലീസുകാരാണ് ആദ്യം കൊല്ലപ്പെട്ടത്. മുത്രപ്പുരയുടെ ചുറ്റിനും നിന്ന് വെടിവയ്ക്കുകയായിരുന്നു. എന്നാല് പുറമേ നിന്ന് പോലീസ് എത്താതിരുന്നതിനാല് വെടിയേറ്റു വീണ് പോലീസുകാരെ തുടര്ന്ന് വികാസ് ദുബെയും കൂട്ടരും വെട്ടിയും കുത്തിയും ദേഷ്യം തീര്ക്കുകയായിരുന്നുവെന്നാണ് കണ്ടെത്തല്.
വീട്ടിനകത്തേയ്ക്ക് കടന്ന ഡെപ്യൂട്ടീ സൂപ്രണ്ട് അടക്കമുള്ള മൂന്ന് പോലീസുദ്യോഗസ്ഥരെ ദുബെ നേരിട്ടാണ് വധിച്ചതെന്ന് മുന്നേ അന്വേഷണ സംഘം കണ്ടെത്തിയിരുന്നു. അതില് ഡെപ്യൂട്ടീ സൂപ്രണ്ടിന് കോടാലികൊണ്ടും മാരകമായി മുറിവേറ്റിരുന്നു. മരണമടഞ്ഞ സര്ക്കിള് ഓഫീസര്ക്ക് ഏറ്റ നാലു വെടിയുണ്ടകള് വളരെ അടുത്തു നിന്നുള്ളതാണെന്നും റിപ്പോര്ട്ടില് പറയുന്നു.
