ന്യൂഡല്ഹി: ഗൂഗിള് ക്രോം ഉപയോഗിക്കുന്നവര്ക്ക് മുന്നറിയിപ്പുമായി സൈബര് സുരക്ഷാ ഏജന്സിയായ ഇന്ത്യന് കമ്പ്യൂട്ടര് എമര്ജന്സി റെസ്പോണ്സ് ടീം (സിഇആര്ടി-ഇന്). ഹൈ അലര്ട്ട് രേഖപ്പെടുത്തിയ സുരക്ഷാ നിര്ദ്ദേശമാണ് സിഇആര്ടി- ഇന് നല്കിയിരിക്കുന്നത്. ഒരു വിദൂര ആക്രമണം തടയാനായി ഗൂഗിള് ക്രോം ഉപയോക്താക്കള് ഉടന് തന്നെ അപ്ഡേറ്റ് ചെയ്യണമെന്നാണ് സുരക്ഷാ ഏജന്സി നിര്ദ്ദേശിച്ചിരിക്കുന്നത്. ഗൂഗിള് ക്രോം 84.0.4147.89 പതിപ്പിന് താഴെയുള്ളവരോടാണ് അപ്ഡേറ്റ് ചെയ്യാന് നിര്ദ്ദേശിച്ചിരിക്കുന്നത്.
ഈ പതിപ്പിലുള്ള ഗൂഗിള് ക്രോം ഉപയോഗിക്കുന്നവര്ക്ക് വലിയ വെല്ലുവിളികളാണ് മുന്നിലുള്ളതെന്നാണ് സിഇആര്ടി- ഇന് വ്യക്തമാക്കുന്നത്. സിസ്റ്റത്തിലേക്ക് മാല്വെയറുകള് സ്ഥാപിക്കുക, സെക്യൂരിറ്റി സംവിധാനങ്ങളെ മറികടക്കുക, സുപ്രധാന വിവരങ്ങള് കൈക്കലാക്കുക, ഉപയോക്താവിന് സിസ്റ്റത്തിന്റെ നിയന്ത്രണം നഷ്ടമാകുക എന്നിങ്ങനെയുള്ള പ്രശ്നങ്ങളാണ് ഇത്തരം ബ്രൗസറുകള് വഴി വരാന് സാധ്യതയെന്നാണ് സിഇആര്ടി- ഇന് പറയുന്നത്.
അപ്ഡേറ്റ് അല്ലാത്ത ഗൂഗിള് ക്രോം ഉപയോഗിക്കുന്നവരുടെ സിസ്റ്റത്തെ ആക്രമിക്കുന്നവര്ക്ക് അതിലെ സുരക്ഷാ പിഴവ് ഉപയോഗിച്ച് എളുപ്പത്തില് കടന്നു കയാറാന് കഴിയുമെന്നും നിര്ദ്ദേശത്തില് വ്യക്തമാക്കുന്നു. അടുത്തിടെ ക്രോം ബ്രൗസറില് ഉപയോഗപ്പെടുത്തുന്ന 110 ഓളം എക്സ്റ്റെന്ഷനുകള് വിവരം ചോര്ത്തുന്നതായുള്ള റിപ്പോര്ട്ടുകള് പുറത്തു വന്നിരുന്നു. ഇത്തരത്തില് കണ്ടെത്തിയവയെ നേരത്തെ ക്രോം സ്റ്റോറില് നിന്നും ഗൂഗിള് പുറത്താക്കിയിരുന്നു.
