ശ്രീനഗര്‍ : ജമ്മു കശ്മീരിന്റെ അമിതാധികാരം എടുത്തുകളഞ്ഞതിന്റെ ഒന്നാം വാര്‍ഷികം ആഘോഷമാക്കി ബിജെപി. ശ്രീനഗറിലെ പാര്‍ട്ടി ഓഫീസില്‍ ത്രിവര്‍ണ്ണ പതാക ഉയര്‍ത്തിയാണ് ബിജെപി നേതാക്കള്‍ ആര്‍ട്ടിക്കിള്‍ 370 റദ്ദാക്കിയതിന്റെ ഒന്നാം വര്‍ഷികം ആഘോഷമാക്കിയത്. ഇതിന് പുറമേ വിവിധയിടങ്ങളില്‍ ബിജെപി നേതാക്കള്‍ ചെറു ആഘോഷ പരിപാടികളും സംഘടിപ്പിച്ചു.
കേന്ദ്ര സര്‍ക്കാര്‍ ആര്‍ട്ടിക്കിള്‍ 370 റദ്ദാക്കിയതിന് ശേഷം ജമ്മു കശ്മീരിന്റെ താഴെ തട്ടുമുതലുള്ള വികസനം സാദ്ധ്യമായതായി ബിജെപി വക്താവ് പറഞ്ഞു. വര്‍ഷങ്ങള്‍ക്ക് ശേഷം ആദ്യമായി കല്ലേറുള്‍പ്പെടെയുള്ള ആക്രമണം ഇല്ലാതായി. ബിഡിസി അംഗങ്ങള്‍ക്ക് അവരവരുടെ അധീനതയിലുള്ള പ്രദേശങ്ങളില്‍ വികസന പ്രവര്‍ത്തനങ്ങള്‍ക്കായി 25 ലക്ഷം രൂപ ലഭിച്ചു. ചരിത്രത്തിലാദ്യമായി കശ്മീര്‍ താഴ്‌വരയിലെ തെരഞ്ഞെടുപ്പ് സമാധാന പരമായി നടന്നെന്നും വക്താവ് വ്യക്തമാക്കി.
ശ്രീനഗറിന് പുറമേ അനന്തനാഗ്, ഗന്ധേര്‍ബാല്‍, കുപ്വാര എന്നിവിടങ്ങളിലാണ് ബിജെപി നേതാക്കള്‍ ആര്‍ട്ടിക്കിള്‍ 370 റദ്ദാക്കിയതിന്റെ ഒന്നാം വാര്‍ഷികം ആഘോഷിച്ചത്. ഭാരത് മാതാ കി ജയ് എന്ന മുദ്രാവാക്യം മുഴക്കി, ത്രിവര്‍ണ്ണ പതാക ഉയര്‍ത്തിയായിരുന്നു ആഘോഷം.
2019 ആഗസ്റ്റ് അഞ്ചിനാണ് ജമ്മു കശ്മീരിന്റെ അമിതാധികാരം കേന്ദ്രസര്‍ക്കാര്‍ എടുത്തു കളഞ്ഞത്. പിന്നീട് ജമ്മു കശ്മീരിനെ രണ്ട് കേന്ദ്ര ഭരണ പ്രദേശങ്ങളായി വിഭജിക്കുകയായിരുന്നു.
