മനുഷ്യരുടെ ഏറ്റവും പ്രിയപ്പെട്ട വളർത്തു മൃഗമായ പൂച്ചകൾക്ക് വേണ്ടി ,എല്ലാവർഷവും ആഗസ്റ്റ് എട്ടാം തീയതി അന്താരാഷ്ട്ര പൂച്ച ദിനമായി ആചരിക്കുന്നു . 2002 ൽ ഇന്റർനാഷണൽ ഫണ്ട് ഫോർ അനിമൽ വെൽഫെയർ എന്ന സംഘടനയാണ് പൂച്ചകൾക്ക് വേണ്ടി ഒരു ദിനം ആഗോളതലത്തിൽ സംഘടിപ്പിക്കാൻ തുടങ്ങിയത് .
ചില രാജ്യങ്ങളിൽ ലോക പൂച്ച ദിനം എന്നുമറിയപെടുന്ന ഈ ദിനം , നിലവിൽ വന്ന നാൾ മുതൽ ഓരോ വർഷവും പ്രചാരം നേടി കൊണ്ടേ ഇരിക്കുന്നു . മറ്റു രാജ്യങ്ങളിൽ നിന്ന് വിഭിന്നമായി പൂച്ചകൾക്ക് വേണ്ടിയുള്ള ദിനം റഷ്യ ആചരിക്കുന്നത് മാർച്ച് ഒന്നിനാണ് . അതുപോലെ തന്നെ അമേരിക്ക ഒക്ടോബർ ഇരുപത്തി ഒൻപതിനാണ് ലോക പൂച്ച ദിനവും ദേശീയ പൂച്ച ദിനവും ആചരിക്കുന്നത് .
ആരോരുമില്ലാതെ അനാഥരാക്കപ്പെട്ട പൂച്ചകളുടെയും ,പൂച്ചകുട്ടികളുടെയും സംരക്ഷണം ഉറപ്പാക്കുന്നതിനും , അവരെ സംരക്ഷിക്കാൻ മനുഷ്യരുടെ ഉള്ളിൽ മനുഷ്യത്വം എന്ന വികാരം ഉണർത്താൻ വേണ്ടിയും കൂടിയാണ് ഇങ്ങിനെ ഒരു ദിനം ആചരിക്കുന്നത് . 2020 ൽ ഇന്റർനാഷണൽ ഫണ്ട് ഫോർ അനിമൽ വെൽഫെയർ എന്ന സംഘടന, ഈ ദിനം സംഘടിപ്പിക്കുന്നതിനും പരിപാടികൾ ആസൂത്രണം ചെയ്യുന്നതിനുമുള്ള അധികാരം , 1958 മുതൽ പൂച്ചകളുടെ സംരക്ഷണത്തിനും ആരോഗ്യപരിപാലനത്തിനും വേണ്ടി പ്രവർത്തിക്കുന്ന സാമൂഹ്യ സംഘടന ആയ ഇന്റർനാഷണൽ ക്യാറ്റ് കെയറിന് കൈമാറി .
ഈ ദിനത്തിൽ ലോകമെമ്പാടുമുള്ള പൂച്ച പ്രേമികൾ തങ്ങളുടെ വളർത്തു പൂച്ചകളുടെ പടം സമൂഹമാദ്ധ്യമങ്ങളിൽ കൂടി പങ്കു വെക്കുന്നത് ഒരു രീതിയായി മാറിയിരിക്കുകയാണ് .ഇപ്പോൾ തന്നെ പൂച്ചകളുടെ വിവിധ ചിത്രങ്ങൾ കൊണ്ട് സമൂഹമാദ്ധ്യമങ്ങൾ നിറഞ്ഞു കവിയുകയാണ് . വിടർന്ന കണ്ണും , നനുത്ത രോമങ്ങളുമുള്ള പൂച്ചകളുടെ കുസൃതികൾ ആരുടെ മുഖത്താണ് പുഞ്ചിരി വിടർത്താത്തത് .
പൂച്ചകൾ വളരെയധികം ശാന്ത സ്വഭാവമുള്ളവയും , സ്വതന്ത്രവും , അന്വേഷണാത്മക സ്വഭാവമുള്ളവയും , സാഹസികതയുള്ളവയുമാണ് .സയാമീസ് , പേർഷ്യൻ , മഞ്ച്കിൻ, ബർമീസ് തുടങ്ങി നാടൻ പൂച്ചകൾ വളരെ മനുഷ്യരുടെ മനസ്സ് കീഴടക്കിയവരാണ് . സ്വന്തമായി പൂച്ചകൾ ഉള്ളവരുടെ മാനസികാരോഗ്യ നില വളരെയധികം മെച്ചപ്പെട്ടതാണ് എന്നാണ് പഠനങ്ങൾ തെളിയിക്കുന്നത് .
നിങ്ങൾക്കും പ്രിയപ്പെട്ട ഒരു വളർത്തു പൂച്ചയുണ്ടെങ്കിൽ , പൂച്ചകൾക്ക് വേണ്ടിയുള്ള ഈ ദിനത്തിൽ കുസൃതിയും കൗതുകവും നിറഞ്ഞ അവരുടെ ചിത്രങ്ങൾ പങ്കു വെച്ച് കൊണ്ട് സന്തോഷം പ്രകടിപ്പിക്കൂ .
