ഈ മാസം അഞ്ചാംതീയതി രാമക്ഷേത്രനിര്‍മാണത്തിന് അയോദ്ധ്യയില്‍ ശിലാസ്ഥാപനം നടന്നതോടെ രാജ്യത്തെ ഹൈന്ദവവിശ്വാസസമൂഹം ആവേശത്തിലാണ്. നൂറ്റാണ്ടുകളുടെ പ്രയത്‌നത്തിന് ശേഷം ആദര്‍ശപുരുഷനായ രാമന്റെ മന്ദിരമുയരുമ്പോള്‍ അതെങ്ങനെയുണ്ടാകുമെന്ന ആകാംക്ഷ ക്ഷേത്രനിര്‍മാണത്തെ വിമര്‍ശിക്കുന്നവര്‍ക്കുമുണ്ടാകാം. രാമക്ഷേത്രത്തിന്റെ രൂപകല്‍പ്പന വ്യാപകമായി ചര്‍ച്ച ചെയ്യപ്പെടുകയാണ്.
ക്ഷേത്രത്തിന് അധികം വലിപ്പം വേണ്ടെന്നും മൂന്ന് താഴികക്കുടങ്ങള്‍ മതിയെന്നുമായിരുന്നു ആദ്യതീരുമാനം. എന്നാല്‍ പിന്നീട് ഈ പദ്ധതിയില്‍ ഒട്ടേറെ മാറ്റങ്ങള്‍ വരുത്തി. 161 അടി ഉയരത്തില്‍ അഞ്ച് താഴികക്കുടങ്ങളുമായാണ് ക്ഷേത്രത്തിന്റെ നിലവിലെ രൂപകല്‍പ്പനയെന്ന് രാമ ജന്മഭൂമി തീര്‍ത്ഥക്ഷേത്ര ട്രസ്റ്റ് അംഗം കാമേശ്വര്‍ ചൗപാല്‍ പറയുന്നു. തൂണുകളുടെ എണ്ണം 212 ല്‍ നിന്ന് 360 ആക്കുകയും ചെയ്തിട്ടുണ്ട്.
വിശ്വ ഹിന്ദു പരിഷത്തിന്റെ നിര്‍ദ്ദേശാനുസൃതമാണ് ക്ഷേത്രത്തിന്റെ മാതൃക. പക്ഷേ വര്‍ഷങ്ങള്‍ക്ക് മുമ്പ് നിശ്ചയിച്ച ഈ മാതൃകയില്‍ അളവുകളില്‍ കാര്യമായ വ്യത്യാസം വരുത്തിയിട്ടുണ്ട്. ക്ഷേത്രനിര്‍മാണത്തിന്റെ ഉത്തരവാദിത്തം ഏറ്റെടുത്ത രാമജന്മഭൂമി തീര്‍ത്ഥക്ഷേത്ര ട്രസ്റ്റ് മന്ദിരത്തിന്റെ മാതൃക പുറത്തിറക്കിയിട്ടുണ്ട്.
70 ഏക്കര്‍ വരുന്ന സ്ഥലത്താണ് ക്ഷേത്രം നിര്‍മ്മിക്കുന്നത്. നിര്‍മ്മാണച്ചെലവിനെക്കുറിച്ച് സാമൂഹികമാദ്ധ്യമങ്ങളില്‍ വ്യത്യസ്തങ്ങളായ അഭിപ്രായങ്ങളാണുള്ളത്. ക്ഷേത്ര നിര്‍മാണത്തിനായി ഫണ്ട് ശേഖരിച്ചുവരികയാണ്.
രാജ്യത്തും പുറത്തും പ്രശസ്തങ്ങളായ പല ക്ഷേത്രങ്ങളും നിര്‍മ്മിച്ചിട്ടുള്ള അഹമ്മദാബാദിലെ സോംപുര കുടുംബത്തിനാണ് ക്ഷേത്ര നിര്‍മാണത്തിന്റെ ഉത്തരവാദിത്തം നല്‍കിയിരിക്കുന്നത്. ചന്ദ്രകാന്ത് സോംപുരയ്‌ക്കാണ് നേരിട്ടുള്ള ഉത്തരവാദിത്തമെങ്കിലും ശാരീരിക അസ്വസ്ഥതകള്‍ കാരണം എല്ലായ്‌പ്പോഴും അയോദ്ധ്യയിലെത്താനാകില്ല. പകരം മകന്‍ ആശിഷിനെ ഇവിടെ നിയോഗിച്ചിരിക്കുകയാണ്. നിര്‍മ്മാണ കമ്പനിയായ ലാര്‍സണ്‍ ആന്‍ഡ് ട്യൂബ്രോ (എല്‍ ആന്‍ഡ് ടി) പദ്ധതിനിര്‍വഹണത്തില്‍ പങ്കാളികളാണ്.
ക്ഷേത്രത്തിന്റെ നിര്‍മാണ പ്രവര്‍ത്തനങ്ങള്‍ ഉടന്‍ സജീവമാകും. പദ്ധതി പൂര്‍ത്തിയാക്കാന്‍ മൂന്നര വര്‍ഷം വരെ എടുത്തേക്കുമെന്ന് ഇതുമായി ബന്ധപ്പെട്ട ആര്‍ക്കിടെക്റ്റുകള്‍ പറയുന്നു. ഇപ്പോഴുള്ള കണക്കനുസരിച്ച് ഇത് ഒരു എസ്റ്റിമേറ്റ് മാത്രമാണ്. ജോലി ആരംഭിച്ചുകഴിഞ്ഞാല്‍ സമയപരിധിയില്‍ വ്യത്യാസം വന്നേക്കാം.
