വാട്സാപ്പ് ഓരോ മാസവും പുതിയ പുതിയ ഫീച്ചറുകൾ ഇറക്കുന്നുണ്ട്. ഏകദേശം രണ്ട് ബില്യൺ ആളുകൾ ആണ് വാട്സപ്പ് ഉപയോഗിക്കുന്നത്. QR കോഡ്, വെബിനും ഡെസ്ക് ടോപ്പിനും ഡാർക്ക് മോഡ്, ആനിമേറ്റഡ് സ്റ്റിക്കറുകൾ എന്നിവയാണ് അടുത്തിടെ വാട്സപ്പ് പുറത്തിറക്കിയ ഫീച്ചറുകൾ. വൈകാതെ തന്നെ ഇനിയും പുത്തൻ ഫീച്ചറുകൾ ഇറക്കുമെന്നാണ് റിപ്പോർട്ടുകൾ സൂചിപ്പിക്കുന്നത്.
വിവിധ ഉപകരണങ്ങളിൽ ഉപയോഗിക്കാം
ഒരൊറ്റ അക്കൗണ്ട് ഒന്നിലധികം ഡിവൈസുകളിൽ നിന്ന് ഉപയോഗിക്കാൻ സാധിക്കും എന്നതാണ് അടുത്ത് തന്നെ പുറത്തിറങ്ങാൻ പോകുന്ന ഫീച്ചർ. ഈ ഫീച്ചറിന്റെ പേര് ലിങ്ക്ഡ് ഡിവൈസ് എന്നായിരിക്കും. ചാറ്റ് ഹിസ്റ്ററി ഒരു മൊബൈലിൽ നിന്ന് മറ്റൊന്നിലേക്ക് പകർത്താനും ഈ ഫീച്ചർ വഴി സാധിക്കും.
നിലവിൽ ഡെസ്ക് ടോപ്പിൽ വാട്സാപ്പ് തുറക്കണമെങ്കിൽ നിങ്ങളുടെ മൊബൈലിലും ഇന്റർനെറ്റ് ഉണ്ടായിരിക്കണം. എന്നാൽ ലിങ്ക്ഡ് ഡിവൈസ് എന്ന ഫീച്ചർ വന്നുകഴിഞ്ഞാൽ ഏത് ഡിവൈസിൽ ആണോ ഓപ്പൺ ചെയ്യുന്നത് അതിൽ മാത്രം ഇന്റർനെറ്റ് മതി.
സന്ദേശങ്ങൾ അപ്രത്യക്ഷമാകും
നിശ്ചിത സമയത്തിനുള്ളിൽ അപ്രത്യക്ഷമാകുന്ന സ്റ്റോറികൾ നിലവിലെ വാട്സാപ്പിൽ ലഭ്യമാണ്. പുതുതായി അവതരിപ്പിക്കുന്ന ഫീച്ചർ സന്ദേശങ്ങൾ അപ്രത്യക്ഷമാകുന്നതാണ്. സന്ദേശം ലഭിക്കുന്ന ആൾ സന്ദേശം വായിച്ചതിന് ശേഷം മാഞ്ഞുപോകുന്നതാണ് ഈ ഫീച്ചർ.
ഇൻ ആപ്പ് വെബ് ബ്രൗസർ
വാട്സാപ്പിൽ വരുന്ന വെബ്സൈറ്റ് ലിങ്കുകൾ ആപ്പിൽ നിന്നു തന്നെ ഓപ്പൺ ചെയ്ത് വായിക്കാവുന്ന ഫീച്ചർ ആണിത്.
സ്റ്റോറേജ് നിയന്ത്രണം
വാട്സാപ്പിൽ ലഭിക്കുന്ന ഓരോ വിവരങ്ങളും ഫോട്ടോസ്, വീഡിയോസ്, ഡോക്യൂമെന്റ്സ് എന്നിങ്ങനെയുള്ള ഫോൾഡറുകളിലാണ് ശേഖരിക്കുന്നത്. ഡിലീറ്റ് ചെയ്യാൻ ഉദ്ദേശിക്കുമ്പോൾ ഓരോന്നായി സെലക്ട് ചെയ്യേണ്ടതായും വരുന്നു. അല്ലെങ്കിൽ ഫോൾഡർ തന്നെ ഡിലീറ്റ് ചെയ്യുകയാണ് വഴി. എന്നാൽ ഇക്കാര്യത്തിൽ ഉപഭോക്താവിന് കൂടുതൽ നിയന്ത്രണം നൽകുവാൻ ഉദ്ദേശിക്കുന്ന പുതിയ ഫീച്ചർ വഴി ആപ്പിൽ തന്നെ പുതിയ സെക്ഷൻ ആരംഭിച്ച് സന്ദേശങ്ങൾ സൂക്ഷിക്കാവുന്നതാണ്.
വെബിൽ തിരയാം
ഫോർവേഡ് സന്ദേശങ്ങളിൽ സംശയം തോന്നിയാൽ, കൂടുതൽ വ്യക്തത ആവശ്യമാണെന്ന് തോന്നിയാൽ വായനക്കാരന് ഒരു ലെൻസ് ഐക്കൺ ഉപയോഗിച്ച് വെബിൽ തിരയാൻ സാധിക്കും എന്നതാണ് പുതിയ ഫീച്ചർ. പല രാജ്യങ്ങളിലും നിലവിൽ ഇത് ഉണ്ടെങ്കിലും ഇന്ത്യയിൽ ഈ ഫീച്ചർ ലഭ്യമായിട്ടില്ല.
