ന്യൂഡല്ഹി: മുന് ഇന്ത്യന് നായകന് മഹേന്ദ്ര സിംഗ് ധോണിയുടെ വിരമിക്കല് പ്രഖ്യാപനത്തിന്റെ ഞെട്ടലിലാണ് ആരാധകര്. ഇഷ്ട താരം ഇന്ത്യയുടെ നീലക്കുപ്പായം അഴിക്കുമ്പോള് ആ 7-ാം നമ്പര് ജഴ്സി മറ്റാര്ക്കും നല്കരുതെന്നാണ് ധോണി ആരാധകര് ആവശ്യപ്പെടുന്നത്. സമൂഹ മാദ്ധ്യമങ്ങളിലുള്പ്പെടെ ഈ ആവശ്യമുന്നയിച്ച് നിരവധിയാളുകളാണ് രംഗത്തെത്തിയിരിക്കുന്നത്.
ഇതിഹാസ നായകന് പടിയിറങ്ങുമ്പോള് ഇനി 7-ാം നമ്പര് ജഴ്സിയില് മറ്റൊരു താരത്തെ കാണാന് ആരാധകര് ഇഷ്ടപ്പെടുന്നില്ല. നേരത്തെ, സച്ചിന് ടെണ്ടുല്ക്കര് വിരമിച്ചപ്പോള് മാത്രമാണ് ആരാധകരുടെ ഇടയില് നിന്നും ഇത്തരത്തിലൊരു ആവശ്യം ഉയര്ന്നു വന്നത്. എന്നാല്, മറ്റൊരു മത്സരത്തില് ശര്ദ്ദൂല് താക്കൂര് 10-ാം നമ്പര് ജഴ്സിയണിഞ്ഞ് കളിക്കാനിറങ്ങിയത് വലിയ വിവാദമായിരുന്നു.
ധോണിയുടെ 7-ാം നമ്പര് ജഴ്സിയും അദ്ദേഹത്തോടൊപ്പം വിരമിക്കണമെന്ന് ബിസിസിഐയോട് ആവശ്യപ്പെട്ട് ഇന്ത്യന് താരം ദിനേഷ് കാര്ത്തിക്കും രംഗത്തെത്തിയിരുന്നു. ട്വിറ്ററില് ധോണിയുടെ അവസാന മത്സരത്തിന് ശേഷം ഒരുമിച്ചെടുത്ത ചിത്രം പങ്കുവെച്ചാണ് കാര്ത്തിക് ഇക്കാര്യം ആവശ്യപ്പെട്ടത്.
