ചാമ്പ്യൻസ് ലീഗിന്റെ സെമിഫൈനലിന് തയ്യാറെടുക്കുന്ന പിഎസ്ജിയ്ക്ക് തിരിച്ചടി. വിശ്വസ്ത ഗോളിയായ കെയ്ലർ നവാസിന്റെ പരിക്കാണ് ടീമിന് തിരിച്ചടിയായിരിക്കുന്നത്. കാലിന്റെ പിൻതുടഞരമ്പിന് പരിക്കേറ്റ നവാസ് സെമിയിൽ കളിക്കില്ല.
അറ്റ് ലാന്റയ്ക്കെതിരായ ക്വാർട്ടർ ഫൈനൽ മത്സരത്തിനിടെയാണ് നവാസിന് പരിക്കേൽക്കുന്നത്. തുടർന്ന് നവാസ് കളിക്കളം വിടുകയും ചെയ്തിരുന്നു. തുടർന്ന് നടത്തിയ പരിശോധനയിൽ പിൻതുടഞരമ്പിൽ മുറിവുണ്ടെന്ന് കണ്ടെത്തി. പരിക്ക് എത്രത്തോളം ഗൗരവമുള്ളതാണെന്ന് വ്യക്തമല്ല. എന്നാൽ ഇന്നലെ നടന്ന പരിശീലനത്തിൽ നവാസ് പങ്കെടുത്തിരുന്നില്ല. ഇതോടെയാണ് താരം സെമിയിൽ ഉണ്ടാകില്ലെന്ന് വ്യക്തമായത്.
നവാസിന്റെ അഭാവത്തിൽ സ്പാനിഷ് ഗോളി സെർജിയോ റിക്കോയാകും ഫ്രഞ്ച് ക്ലബിന്റെ ഗോൾവല കാക്കുക.
