ന്യൂഡല്ഹി: ദേശീയ കായിക ബഹുമതികളുടെ സമ്മാനതുക വര്ദ്ധിപ്പിച്ച് കേന്ദ്രസര്ക്കാര്. ഖേല്രത്ന, ദ്രോണാചാര്യ, അര്ജ്ജുന ബഹുമതികളുടെ തുകയാണ് വര്ദ്ധിപ്പിച്ചത്. ഖേല്രത്നയ്ക്ക് ഈ വര്ഷം മുതല് 25 ലക്ഷം രൂപയും അര്ജ്ജുന അവാര്ഡിന് 15 ലക്ഷം രൂപയും ലഭിക്കും. ബഹുമതികള്ക്ക് കഴിഞ്ഞ വര്ഷം വരെ യഥാക്രമം7.5 , 5 ലക്ഷം എന്നിങ്ങനെയാണ് സമ്മാനിച്ചിരുന്നത്. പരിശീലകര്ക്ക് നല്കുന്ന ദ്രോണാചാര്യ ബഹുമതി 5 ലക്ഷത്തില് നിന്നും 10 ലക്ഷത്തിലേയ്ക്ക് ഉയര്ത്തി.
കേന്ദ്ര കായിക മന്ത്രാലയം ബഹുമതികളുടെ ഔദ്യോഗിക പ്രഖ്യാപനം നടത്താനുള്ള ഒരുക്കത്തിലാണെന്ന് കേന്ദ്രകായിക മന്ത്രി കിരണ് റിജിജു പറഞ്ഞു. ദേശീയ കായിക ദിനമായി ആഗസ്റ്റ് മാസം 29-ാം തീയതിയാണ് പ്രഖ്യാപനവും വിതരണവും നടത്തുക. കേന്ദ്രസര്ക്കാര് പ്രത്യേക താല്പ്പര്യമെടുത്താണ് കായിക രംഗത്തെ പ്രതിഭകളുടെ സമ്മാനതുക വര്ദ്ധിപ്പിച്ചിരിക്കുന്നത്. രാജ്യത്തിന്റെ അഭിമാനം ലോകവേദികളില് ഉയര്ത്തുന്ന അംബാസഡര്മാരാണ് കായികതാരങ്ങള്. അവരുടെ പരിശ്രമങ്ങള്ക്കും നേട്ടങ്ങള്ക്കും അര്ഹിക്കുന്ന പരിഗണന നല്കണം. ഒരു താരത്തിന് ജീവിതത്തി ലൊരിക്കലാണ് ഒരു ദേശീയ ബഹുമതി നല്കുന്നതെന്നും മന്ത്രി പറഞ്ഞു.
Comments