ചെന്നൈ: ഈ സീസണിലെ ഐപിഎല്‍ മത്സരങ്ങളില്‍ മാറ്റുരക്കാനായി ധോണിയുടെ നേതൃത്വത്തില്‍ ചെന്നൈ സൂപ്പര്‍ കിംഗ്‌സ് വിമാനം കയറിക്കഴിഞ്ഞു. വിരമിക്കല്‍ പ്രഖ്യാപനത്തിന് ശേഷം വീണ്ടും പാഡണിയുന്ന ധോണിയുടെ മിന്നും പ്രകടനത്തിനായാണ് ആരാധകര്‍ കാത്തിരിക്കുന്നത്. പൊതുവെ കൂളായ ക്യാപ്റ്റന്‍ സമ്മര്‍ദ്ദത്തിന് അടിമപ്പെടുമോ എന്നാണ് ഏവരും ഉറ്റുനോക്കുന്നത്.
എന്നാല്‍, ആശങ്കകളെയും ആകുലതകളെയും കാറ്റില്‍ പറത്തി സിഎസ്‌കെ സിഇഒ കാശി വിശ്വനാഥന്‍ രംഗത്തെത്തി. നെറ്റ്സില് ധോണിയുടെ പരിശീലനം അമ്പരപ്പോടെയാണ് നോക്കി നിന്നത് എന്നാണ് അദ്ദേഹം പറഞ്ഞത്. ഗ്രൗണ്ടിന്റെ എല്ലാ ഭാഗത്തേക്കും സിക്സറുകള് പറന്നെന്നും നെറ്റ്സില് പഴയ ധോണിയെയാണ് തനിക്ക് കാണാനായതെന്നും വിശ്വനാഥന്‍ വ്യക്തമാക്കി.
വളരെ മികച്ച രീതിയിലായിരുന്നു ധോണി പന്ത് സ്ട്രൈക്ക് ചെയ്തു കൊണ്ടിരുന്നത്. ഗ്രൗണ്ടിന്റെ പല വശങ്ങളിലേക്കും അദ്ദേഹത്തിന്റെ സിക്സറുകള് പറന്നു. പതിവു പോലെ തന്നെ വളരെ ആത്മവിശ്വാസമുള്ള, ശാന്തനായ, സന്തോഷവാനായ ധോണിയെയാണ് നെറ്റ്സില് തനിക്കു കാണാനായതെന്നും വിശ്വനാഥന്‍ വ്യക്തമാക്കി. ആഗസ്റ്റ് 15ന് ആരംഭിച്ച പരിശീലന ക്യാംപില്‍ ധോണി, സുരേഷ് റെയ്ന എന്നിവരടക്കം ചെന്നൈ സൂപ്പര്‍ കിംഗ്‌സിലെ മിക്ക ഇന്ത്യന്‍ താരങ്ങളും പങ്കെടുത്തിരുന്നു.
