ശിവക്ഷേത്രത്തില്‍ പ്രധാനമായി ചെയ്തു വരുന്ന രണ്ടു വഴിപാടുകളാണ് ജലധാരയും പിന്‍വിളക്കും. ജലധാര ശിവഭഗവാന് ഏറ്റവും ഇഷ്ടപ്പെട്ട വഴിപാടാണ്. പിന്‍വിളക്കിനെ പാര്‍വതി ദേവിയായിട്ടാണ് സങ്കല്‍പ്പിക്കുന്നത്. അതിനാല്‍ പാര്‍വതി ദേവിയുടെ പ്രീതിക്കു വേണ്ടി ചെയ്യുന്ന ഒരു വഴിപാടാണ് പിന്‍വിളക്ക്. അതുകൊണ്ടു തന്നെ ദമ്പതികള്‍ ദാമ്പത്യ സുഖത്തിനും പരസ്പര ഐക്യത്തിനും വേണ്ടി ജലധാരയും പിന്‍വിളക്കും ഒരുമിച്ച് കഴിപ്പിക്കുന്നത് വളരെ നല്ലതാണ്. ദാമ്പത്യ കലഹം, ദാമ്പത്യ തകര്‍ച്ച, കുടുംബത്തിലുണ്ടാകുന്ന അസ്വസ്ഥതകള്‍ എന്നിവയെല്ലാം പരിഹരിക്കാന്‍ ഇവ കഴിപ്പിക്കുന്നത് നല്ലതാണ്.
എല്ലാമാസവും സ്ഥിരമായി ദമ്പതികളുടെ രണ്ടു പേരുടെയും ജന്മ നാളില്‍ ജലധാരയും പിന്‍വിളക്കും കഴിപ്പിക്കുന്നതിന്റെ കൂടെ ഐക്യമത്യ പുഷ്പാഞ്ജലി കഴിപ്പിക്കുന്നതും കുടുംബത്തില്‍ സന്തോഷവും സമാധാനവും ദമ്പതികള്‍ക്കിടയില്‍ ഒത്തൊരുമയും നിലനില്‍ക്കുന്നതിനു കാരണമാകുന്നു. ശിവ ഭഗവാന് ഏറെ പ്രിയപ്പെട്ട വഴിപാടായ ധാരയ്‌ക്കായി ഉപയോഗിക്കുന്നത് എപ്പോഴും നല്ല ശുദ്ധമായ വെള്ളം ആയിരിക്കണം. ഇതിനു പുറമെ ഇളനീര്‍ ധാരയും ക്ഷീര ധാരയും കഴിപ്പിക്കാറുണ്ട്. ധാര കഴിപ്പിച്ച ശേഷം തീര്‍ത്ഥം കുടിച്ചാല്‍ മാത്രമേ അതിന്റെ പൂര്‍ണ്ണ ഫലം ലഭിക്കുകയുള്ളൂ.
ശിവ ഭഗവാന്റെ പാതിയായാണ് പാര്‍വതി ദേവിയെ കാണുന്നത്. ദാമ്പത്യ സുഖത്തിനും ഐക്യത്തിനു വേണ്ടി വലിയ തരത്തിലുളള പൂജകള്‍ നടത്താറുണ്ട്. എന്നാല്‍ അതിലും ഏറെ ഫലപ്രദമാണ് ശിവക്ഷേത്രത്തില്‍ ലളിതമായി കഴിക്കാവുന്ന ഈ രണ്ടു വഴിപാടുകള്‍. മാസത്തിലൊരിക്കല്‍ ഭര്‍ത്താവിന്റേയും ഭാര്യയുടേയും ജന്മനക്ഷത്രത്തിലാണ് കഴിപ്പിക്കേണ്ടത്. കൂടാതെ കുട്ടികളിലെ അമിതമായ വാശി കുറയ്‌ക്കാനും അമിതമായ ദേഷ്യം ഉള്ളവരില്‍ അതു നിയന്ത്രിക്കുന്നതിനും, ശനി ദോഷ നിവാരണത്തിനുമായി മാസം തോറും ജന്മ നാളില്‍ ശിവഭഗവാന് ധാര ചെയ്യുന്നത് വളരെ ഗുണപ്രദമാണ്.
