വാഹനം കയ്യില്‍ കിട്ടിയാല്‍ പിന്നെ നിലത്തൊന്നുമല്ല നമ്മുടെ യുവതലമുറ. നിലത്തുകൂടി തന്നയാണോ വണ്ടി ഓടിക്കുന്നത് എന്ന് വരെ നമുക്ക് തോന്നുന്ന തരത്തിലാണ് അവരുടെ യാത്ര. അത്രയും വേഗത്തിലായിരിക്കും ഡ്രൈവിംഗ്. ചോദിച്ചാല്‍ നന്നായി വാഹനം ഓടിക്കാന്‍ അറിയാം എന്നതാണ് അവരുടെ മറുപടി. പക്ഷേ എത്ര നന്നായി വണ്ടി ഓടിക്കാന്‍ അറിയുന്ന ആളാണെങ്കിലും ചില റോഡുകളിലൂടെ പോകുമ്പോള്‍ ഒന്ന് പേടിക്കണം അല്ലെങ്കില്‍ ഒന്ന് ശ്രദ്ധിക്കണം. ലോകത്തിന്റെ പല ഭാഗങ്ങളിലായി അങ്ങനെ ചില റോഡുകളുണ്ട്. അതില്‍ ഒന്ന് നമ്മുടെ രാജ്യത്തു തന്നെയുളള ജമ്മുകാശ്മീരിലെ കിസ്ത്വാ റോഡാണ്.
മുപ്പത് കിലോമീറ്റര്‍ നീണ്ടു കിടക്കുന്ന ഈ റോഡ് സമുദ്രനിരപ്പില്‍ നിന്നും ഏഴായിരം അടി ഉയരത്തിലായി സ്ഥിതിചെയ്യുന്നത്. ഈ റോഡിന്റെ ഒരു ഭാഗത്ത് കൊക്കയും മറു ഭാഗത്ത് പാറക്കെട്ടുകളുമാണ്. ഇടയ്‌ക്കിടെയുളള കോട മഞ്ഞ് ഈ റോഡിനെ കൂടുതല്‍ അപകടകരമാക്കുന്നു. അതുപോലെ തന്നെ വളരെ അപകടകരമായ ഒരു റോഡാണ് നോര്‍വേയില്‍ അറ്റ്‌ലാന്റിക് ഓഷ്യന് മുകളിലൂടെ നിര്‍മിക്കപ്പെട്ടിട്ടുള്ള അറ്റ്‌ലാന്റിക് ഓഷ്യന് റോഡ്. സമുദ്രത്തിനു മുകളിലൂടെ ആയതിനാല്‍ ശക്തിയേറിയ തിരമാലകള്‍ കാരണം ഇരുപത് വര്‍ഷം കൊണ്ടാണ് 8.3 കിലോമീറ്റര്‍ നീളത്തിലുളള ഈ റോഡ് നിര്‍മ്മിച്ചത്. റോഡിലേക്ക് തിരമാലകള്‍ വരുന്നത് അപകടത്തിനു കാരണമാകാറുണ്ട്.
വെള്ളത്തില്‍ നിര്‍മ്മിക്കപെട്ടിട്ടുളള റോഡ് ഓണ്‍ വാട്ടര്‍ ആണ് മറ്റൊരു അപകടകരമായ റോഡ്. നാലു കിലോമീറ്റാണ് ഈ റോഡിന്റെ നീളം. ഏതു സമയവും റോഡില്‍ വെള്ളം കയറാന്‍ സാധ്യതയുളളതിനാല്‍ ഫ്രാന്‍സിലെ സര്‍ക്കാറിന്റെ വെബ്‌സൈറ്റ് നോക്കിയ ശേഷമേ ഇതിലൂടെ പോകാന്‍ സാധിക്കുകയുളളൂ. അതു പോലെ തന്നെ അപകടകരമായ ഒരു റോഡാണ് ഇറ്റലിയിലാണ് സ്ഥിതിചെയ്യുന്ന സ്റ്റെല്‍വിയോ പാസ്. അപകടകരമായ എഴുപത്തിയഞ്ച് വളവുകളുളള ഈ റോഡിന്റെ നീളം നാല്‍പത് കിലോ മീറ്ററാണ് .
