ദുബായ്: ഐപിഎല്ലിലെ അരങ്ങേറ്റ മത്സരം അവിസ്മരണീയമാക്കിയ മലയാളി താരം ദേവ്ദത്ത് പടിക്കലിന് അഭിനന്ദന പ്രവാഹം. ഏറ്റവുമൊടുവിൽ ബിസിസിഐ അദ്ധ്യക്ഷൻ സൗരവ് ഗാംഗുലിയും ദേവ്ദത്തിനെ അഭിനന്ദിച്ച് രംഗത്തെത്തിയിരിക്കുകയാണ്. ഇടംകൈയ്യൻ താരത്തിന്റെ ബാറ്റിംഗ് വിരുന്ന് എന്നാണ് ഗാംഗുലി ട്വിറ്ററിൽ കുറിച്ചത്.
പടിക്കലിന്റെ ബാറ്റിംഗ് ആസ്വദിച്ചെന്ന് ഗാംഗുലി പറഞ്ഞു. ഗാംഗുലിക്ക് പുറമെ, ആകാശ് ചോപ്ര, ഹർഷ ഭോഗ് ലെ എന്നിവരും ആശംസകളുമായി രംഗത്തെത്തി. എതിർ ടീമാണെങ്കിലും രാജസ്ഥാൻ റോയൽസും ദേവ്ദത്തിന്റെ പ്രകടനത്തെ അഭിനന്ദിക്കാൻ മറന്നില്ല. പടിക്കൽ ഒരു മാണിക്യമാണെന്നായിരുന്നു രാജസ്ഥാന്റെ പ്രതികരണം.
അരങ്ങേറ്റക്കാരന്റെ ഒരു പരിഭ്രമവും ഇല്ലാതെയാണ് ദേവ്ദത്ത് ബാറ്റുവീശിയത്. 42 പന്തിൽ എട്ട് ബൗണ്ടികളോടെ 56 റൺസെടുത്ത ദേവ്ദത്ത് കോഹ്ലിയുടെ വിശ്വാസം കാത്തു. റോയല് ചലഞ്ചേഴ്സ് ബാംഗ്ലൂരിന്റെ ജയത്തില് നിര്ണായകമായത് ദേവ്ദത്തിന്റെ തുടക്കമായിരുന്നു. വരും മത്സരങ്ങളിലും ഇതേ ഫോം തുടർന്നാൽ മറ്റൊരു മലയാളി താരം കൂടി നീലക്കുപ്പായം അണിയാനുള്ള സാധ്യതയാണ് തെളിഞ്ഞുവരുന്നത്.
