ദുബായ്: ചെന്നൈ സൂപ്പര്‍ കിംഗ്‌സിനെതിരെ ഡല്‍ഹി ക്യാപിറ്റല്‍സിന് മികച്ച സ്‌കോര്‍. നിശ്ചിത 20 ഓവറില്‍ 3 വിക്കറ്റ് നഷ്ടത്തില്‍ ഡൽഹി ക്യാപിറ്റൽസ് 175 റണ്‍സ് എടുത്തു. ഓപ്പണറായി ഇറങ്ങി അര്‍ദ്ധ സെഞ്ച്വറി (64) കുറിച്ച പൃഥ്വി ഷായുടെ പ്രകടനമാണ് ഡല്‍ഹിയ്‌ക്ക് മികച്ച സ്‌കോര്‍ സമ്മാനിച്ചത്.
നേരത്തെ. ടോസ് നേടി ബൗളിംഗ് തെരഞ്ഞെടുത്ത ചെന്നൈയ്ക്ക് ഡല്‍ഹിയുടെ മേല്‍ ആധിപത്യം നേടാനായില്ല. ഓപ്പണര്‍മാരായ ശിഖര്‍ ധവാനും(35) പൃഥ്വി ഷായും ഡല്‍ഹിക്ക് മികച്ച തുടക്കമാണ് നല്‍കിയത്. ഒന്നാം വിക്കറ്റില്‍ ഇരുവരും ചേര്‍ന്ന് 94 റണ്‍സിന്റെ കൂട്ടുകെട്ടാണ് പടുത്തുയര്‍ത്തിയത്. മൂന്നാമനായെത്തിയ ഋഷഭ് പന്തും (37*) പിന്നാലെയെത്തിയ ശ്രേയസ് അയ്യരും (26) മികച്ച രീതിയില്‍ ബാറ്റ് വീശിയെങ്കിലും ടീമിനായി വലിയ സ്‌കോര്‍ കണ്ടെത്താന്‍ സാധിച്ചില്ല.
ചെന്നൈയ്ക്ക് വേണ്ടി പീയുഷ് ചൗള 4 ഓവറില്‍ 33 റണ്‍സ് വഴങ്ങി 2 വിക്കറ്റ് വീഴ്‌ത്തി. സാം കറന്‍ ഒരു വിക്കറ്റ് സ്വന്തമാക്കി. കഴിഞ്ഞ മത്സരത്തിലെ ടീമില്‍ ഒരു മാറ്റവുമായാണ് ചെന്നൈ കളത്തിലിറങ്ങിയത്. ദക്ഷിണാഫ്രിക്കന്‍ പേസര്‍ ലുംഗി എന്‍ഗിഡിക്കു പകരം ഓസ്ട്രേലിയന്‍ പേസര്‍ ജോഷ് ഹേസല്‍വുഡ് ടീമിലിടം നേടി. അതേസമയം, ഡല്‍ഹി ടീമില്‍ രണ്ടു മാറ്റങ്ങള്‍ വരുത്തി. അശ്വിനു പകരം അമിത് മിശ്രയും മോഹിത് ശര്‍മ്മയ്‌ക്കു പകരം ആന്റിച്ച് നോര്‍ട്ടെയും ടീമിലെത്തി.
