അബുദാബി: മുംബൈ ഇന്ത്യന്സിനെതിരെ രാജസ്ഥാന് റോയല്സിന് 194 റണ്സ് വിജയലക്ഷ്യം. ആദ്യം ബാറ്റ് ചെയ്ത മുംബൈ നിശ്ചിത 20 ഓവറില് 4 വിക്കറ്റ് നഷ്ടത്തില് 193 റണ്സെടുത്തു. സൂര്യകുമാര് യാദവിന്റെ പ്രകടനമാണ് മുംബൈയ്ക്ക് മികച്ച സ്കോര് സമ്മാനിച്ചത്.
ഓപ്പണര്മാരായ ക്വിന്റണ് ഡീകോക്കും(23) രോഹിത് ശര്മ്മയും(35) മുംബൈയ്ക്ക് മികച്ച തുടക്കമാണ് നല്കിയത്. ഒന്നാം വിക്കറ്റില് ഇരുവരും ചേര്ന്ന് 49 റണ്സ് കുറിച്ചു. മൂന്നാമനായെത്തിയ സൂര്യകുമാര് യാദവ് 47 പന്തിൽ 79 റണ്സ് നേടി പുറത്താകാതെ നിന്നു. 11 ബൗണ്ടറികളും രണ്ട് സിക്സറുകളുമാണ് സൂര്യകുമാറിന്റെ ബാറ്റില് നിന്നും പിറന്നത്. കഴിഞ്ഞ മത്സരങ്ങളില് മികച്ച പ്രകടനം പുറത്തെടുത്ത ഇഷന് കിഷന് ആദ്യ പന്തില് തന്നെ പുറത്തായി. 19 പന്തില് 30 റണ്സുമായി ഹര്ദ്ദിക് പാണ്ഡ്യയും സൂര്യകുമാര് യാദവിന് മികച്ച പിന്തുണ നല്കി.
രാജസ്ഥാന് വേണ്ടി ശ്രേയസ് ഗോപാല് 4 ഓവറില് 28 റണ്സ് വഴങ്ങി 2 വിക്കറ്റ് വീഴ്ത്തി. ജോഫ്ര ആര്ച്ചര്, കാര്ത്തിക് ത്യാഗി എന്നിവര് ഓരോ വിക്കറ്റ് വീതം സ്വന്തമാക്കി.
