പൂനെ: ഇന്ത്യന് കായികതാരങ്ങളില് അമ്പെയ്ത്ത് വിഭാഗം ഒളിമ്പിക്സിനായുള്ള പരിശീലനം ആരംഭിച്ചു. പൂനെയിലെ ആര്മി സ്പോര്ട്ട്സ് ഇന്സ്റ്റിറ്റ്യൂട്ടിലാണ് പരിശീലനം നടക്കുന്നത്. ആഗസ്റ്റ് മാസം 25 മുതലാണ് ഇന്ത്യന് ആര്ച്ചറി അസോസിയേഷന്റെ പരിശീലനം ആരംഭിച്ചത്. കൊറോണ ലോക്ഡൗണിന് ശേഷം ഔദ്യോഗികമായി ദേശീയ പരിശീലനം പുന:രാരംഭിച്ചതിന്റെ ആവേശത്തിലാണ് കായികതാരങ്ങള്.
അര്ജ്ജുന അവാര്ഡ് ജേതാവ് അതാനു ദാസാണ് പരിശീലനം ഇടയ്ക്ക് മുടങ്ങിയതിന്റെ വിഷമവും പിന്നീടുണ്ടായ ആശ്വാസവും പങ്കുവെച്ചത്. പരിശീലനം പൂര്ണ്ണ തോതില് ആയിവരുന്നേയുള്ളൂ വെന്നും ചില താരങ്ങള് ഇടയ്ക്ക് കൊറോണ ക്വാറന്റൈന് കാരണം ക്യാമ്പിലെത്താന് വൈകിയെന്നും ദാസ് പറഞ്ഞു. മുന് ലോക ഒന്നാം നമ്പര് ദീപികാ കുമാരിയും പരിശീലന കേന്ദ്രത്തിലെ സൗകര്യങ്ങളില് പൂര്ണ്ണ തൃപ്തയാണ്. ടോക്കിയോ ഒളിമ്പിക്സ് 2021ലേക്കാണ് മാറ്റിയിരിക്കുന്നത്. 2022 ലേക്ക് മാറാനും സാധ്യത കാണുന്നുണ്ട്. യോഗ്യതാ മത്സരങ്ങളെല്ലാം അടുത്തവര്ഷം നടക്കും.
