ഷാർജ: ആവേശകരമായ മത്സരത്തിൽ ഡൽഹി ക്യാപിറ്റൽസിനെതിരെ മുംബൈ ഇന്ത്യൻസിന് 5 വിക്കറ്റ് ജയം. 163 റൺസ് വിജയലക്ഷ്യം പിന്തുടർന്ന മുംബൈ 19.4 ഓവറിൽ 5 വിക്കറ്റ് നഷ്ടത്തിൽ ലക്ഷ്യം മറികടന്നു.
ഓപ്പണർമാരായ രോഹിത് ശർമ്മയും(5) ക്വിന്റൻ ഡീക്കോക്കും മുംബൈക്ക് ഭേദപ്പെട്ട തുടക്കമാണ് നൽകിയത്. ഒന്നാം വിക്കറ്റിൽ ഇരുവരും ചേർന്ന് 31 റൺസ് കുറിച്ചു. മുന്നിൽ നിന്ന് നയിച്ച ഡീകോക്ക് 36 പന്തിൽ 4 ബൗണ്ടറികളും 3 സിക്സറുകളും സഹിതം 53 റൺസ് എടുത്തു. കഴിഞ്ഞ മത്സരത്തിന് സമാനമായി മൂന്നാമനായെത്തിയ സൂര്യകുമാർ യാദവും അർദ്ധസെഞ്ച്വറി(53) നേടി.
15 പന്തിൽ 28 റൺസ് നേടിയ ഇഷാൻ കിഷന്റെ ഇന്നിംഗ്സും മുംബൈയുടെ വിജയത്തിൽ നിർണായകമായി. ഡൽഹിക്ക് വേണ്ടി കാഗിസോ റബാഡ 4 ഓവറിൽ 28 റൺസ് വഴങ്ങി 2 വിക്കറ്റ് വീഴ്ത്തി. ആക്സെർ പട്ടേൽ., രവിചന്ദ്രൻ അശ്വിൻ, മാർക്കസ് സ്റ്റോയിനിസ് എന്നിവർ ഓരോ വിക്കറ്റ് വീതം സ്വന്തമാക്കി.
