ദുബായ്: ഐപില്ലില്‍ ഇന്ന് ഡല്‍ഹി ക്യാപിറ്റല്‍സ് രാജസ്ഥാന് റോയല്‍സിനെ നേരിടും. പോയിന്റ് പട്ടികയില്‍ മുംബൈയെ മറികടന്ന് ഒന്നാം സ്ഥാനമാണ് ഡല്‍ഹി ലക്ഷ്യമിടുന്നതെങ്കില്‍ വിമര്‍ശകരുടെ വായടപ്പിക്കാനുള്ള ജയം ലക്ഷ്യമിട്ടാകും രാജസ്ഥാന് ഇറങ്ങുക. ദുബായിയില്‍ ഇന്ത്യന്‍ സമയം രാത്രി 7.30നാണ് മത്സരം.
ഇതുവരെയുള്ള പ്രകടനത്തിന്റെ അടിസ്ഥാനത്തില്‍ ഇരു ടീമുകളെയും വിലയിരുത്തിയാല്‍ ഡല്‍ഹിയ്‌ക്കാണ് മേല്‍ക്കൈ. കളിച്ച 7 കളികളില്‍ 5 എണ്ണത്തിലും ജയിച്ചാണ് ഡല്‍ഹിയുടെ വരവ്. ബാറ്റിംഗ് നിരയും ബൗളിംഗ് നിരയും സന്തുലിതമാണ്. എന്നാല്‍ പ്ലേ ഓഫ് ലക്ഷ്യമിട്ട് കുതിക്കുന്ന ഡല്‍ഹിയ്‌ക്ക് വിക്കറ്റ് കീപ്പറായ ഋഷഭ് പന്തിന്റെ പരിക്ക് തിരിച്ചടിയായിരിക്കുകയാണ്. 10 ദിവസമെങ്കിലും താരത്തിന് വിശ്രമം വേണ്ടി വരുമെന്നാണ് റിപ്പോര്‍ട്ട്. പകരക്കാരനായി അലക്‌സ് ക്യാരിയെ പരിഗണിച്ചാല്‍ മികച്ച ഫോമിലുള്ള ഷിമ്രോണ്‍ ഹെറ്റ്മയറെ ഡല്‍ഹിക്ക് പുറത്തിരുത്തണ്ടി വരും.
പൃഥ്വി ഷാ നല്‍കുന്ന തുടക്കത്തിന്റെ ചുവടുപിടിച്ചാണ് ഡല്‍ഹിയുടെ സ്‌കോറിംഗ് മുന്നോട്ട് പോകുന്നത്. പൃഥ്വിയുടെ വിക്കറ്റ് വീണാല്‍ ഡല്‍ഹിയുടെ റണ്‍ റേറ്റിനെ അത് കാര്യമായി ബാധിക്കുന്നുണ്ട്. ശിഖര്‍ ധവാന്‍, ശ്രേയസ് അയ്യര്‍, അജിങ്ക്യ രഹാനെ എന്നീ ടോപ് ഓഡര്‍ ബാറ്റ്സ്മാന്‍മാര്‍ ഹാര്‍ഡ് ഹിറ്റര്‍മാരല്ല. അതിനാല്‍ തന്നെ മധ്യനിരയില്‍ മാര്‍ക്കസ് സ്റ്റോയിനിസിന് കൂടുതല്‍ ഉത്തരവാദിത്തം ഏറ്റെടുക്കേണ്ട അവസ്ഥയാണ് ഇപ്പോള്‍ ഉള്ളത്.
മറുഭാഗത്ത് ആദ്യത്തെ രണ്ട് മത്സരങ്ങള്‍ മാറ്റിനിര്‍ത്തിയാല്‍ അത്ര മികച്ച പ്രകടനമല്ല രാജസ്ഥാന് റോയല്‍സ് പുറത്തെടുത്തിരിക്കുന്നത്. ഷാര്‍ജയിലെ ചെറിയ മൈതാനത്ത് അടിച്ചു തകര്‍ത്ത മലയാളി താരം സഞ്ജു സാംസണ്‍ പിന്നീട് തിളങ്ങിയില്ല. ആദ്യം നിരാശപ്പെടുത്തിയെങ്കിലും ജോസ് ബട്‌ലര്‍ ഫോമിലേയ്‌ക്ക് ഉയര്‍ന്നതും ഓള്‍ റൗണ്ടറായ ബെന്‍ സ്‌റ്റോക്‌സ് മടങ്ങിയെത്തിയതും മാത്രമാണ് രാജസ്ഥാന് ആശ്വസിക്കാന്‍ വക നല്‍കുന്നത്. ഓള്‍ റൗണ്ട് പ്രകടനം പുറത്തെടുക്കുന്ന രാഹുല്‍ തെവാതിയ ടീമിന് ആവശ്യം വരുന്ന ഘട്ടങ്ങളില്‍ മികച്ച പ്രകടനം പുറത്തെടുക്കുന്നുണ്ട്.
ഐപിഎല്ലില്‍ എല്ലാ ടീമികളും ആദ്യ റൗണ്ട് മത്സരങ്ങള്‍ പൂര്‍ത്തിയാക്കിയിരിക്കുകയാണ്. എന്നാല്‍ 7 കളികളില്‍ 3 ജയവുമായി രാജസ്ഥാന് ഏഴാം സ്ഥാനത്താണ്. ഇനിയുള്ള മത്സരങ്ങള്‍ ജയിച്ചാല്‍ മാത്രമെ രാജസ്ഥാന് പ്ലേ ഓഫ് സാധ്യത നിലനിര്‍ത്താന്‍ സാധിക്കുകയുള്ളൂ. മോശം റണ്‍ റേറ്റും രാജസ്ഥാന് തിരിച്ചടിയാണ്.
