മാഡ്രിഡ്: ചാമ്പ്യന്സ് ലീഗില് ഇന്ന് കരുത്തന്മാരുടെ പോരാട്ടം. ആകെ എട്ടു ടീമുകളാണ് ഇന്ന് രണ്ടാംഘട്ട മത്സരങ്ങൾക്ക് ഇറങ്ങുന്നത്. സ്പാനിഷ് ലീഗിലെ റയല്മാഡ്രിഡും ഇറ്റാലിയന് ലീഗ് വമ്പന്മാരായ ഇന്റര് മിലാനും ഇന്ന് നേര്ക്കുനേര് പോരാടും. ഇംഗ്ലീഷ് പ്രീമിയര് ലീഗ് കരുത്തരായ മാഞ്ചസ്റ്റര് സിറ്റി, ലിവര്പൂള് ടീമുകള്ക്കും മത്സരമുണ്ട്. ജര്മ്മന് ലീഗിലെ കരുത്തരായ ബയേണ് മ്യൂണിച്ചും ഡച്ച് ലീഗിലെ കരുത്തരായ അജാക്സും ഇന്ന് കളത്തിലിറങ്ങും.
സൂപ്പര് പോരാട്ടമാണ് റയല് മാഡ്രിഡ് – ഇന്റര് മിലാന് മത്സരത്തില് ഇന്ന് ആരാധകര് പ്രതീക്ഷിക്കുന്നത്. ഇന്റര് മിലാന് തുറപ്പുചീട്ടായ റൊമേലു ലൂക്കാക്കു പരിക്കുമൂലം കളിക്കാത്തത് ടീമിന് ക്ഷീണമാണ്. ഈ സീസണില് ഇതുവരെ 27കാരനായ മുന്നേറ്റനിര താരം ഏഴു ഗോളുകള് നേടിക്കഴിഞ്ഞു. പകരമായി അലെക്സിസ് സാഞ്ചസ് ഇന്ന് കളിക്കാനിറങ്ങും. കഴിഞ്ഞ മൂന്ന് മത്സരങ്ങളില് സാഞ്ചസ് കളിച്ചിരുന്നില്ല. റയല് മാഡ്രിഡ് നിരയില് പ്രതിരോധ നിരയിലെ ഇദര് മിലിറ്റാവോ കൊറോണ മൂലം കളിക്കില്ല. ഒപ്പം നാച്ചോവും ഡാനി കാരാവാജാലും , മാര്ട്ടിന് ഓഡേഗാര്ഡും പരിക്കുമൂലം ചികിത്സയിലാണ്.
