ദുബൈ : സൂപ്പർ താരം മോഹൻ ലാൽ ഐപിഎൽ ഫൈനൽ കാണാനെത്തിയതിനു പിന്നിൽ മറ്റ് ചില കാര്യങ്ങൾ കൂടിയുണ്ടെന്നുള്ള അഭ്യൂഹങ്ങൾ ശക്തമാകുന്നു. ഐപിഎല്ലിൽ വരാൻ പോകുന്ന പുതിയ ഫ്രാഞ്ചെസിയെ മോഹൻ ലാൽ സ്വന്തമാക്കുമെന്നാണ് സൂചന.വാർത്ത പുറത്തുവന്നതോടെ തങ്ങൾക്ക് സ്വന്തമായി ഒരു ടീം കിട്ടുമെന്ന ആവേശത്തിലാണ് ലാലേട്ടൻ ആരാധകർ.
ഐപിഎൽ ഫൈനലിന് പിന്നാലെ അടുത്ത സീസണിൽ പുതിയൊരു ഫ്രാഞ്ചൈസി കൂടി വന്നേക്കും എന്ന് ബിസിസിഐ നേരത്തെ സൂചന നൽകിയിരുന്നു. 2021 സീസണിന് മുൻപ് താര ലേലത്തിന് ഒരുങ്ങാനും ഫ്രാഞ്ചൈസികളോട് ബിസിസിഐ നിർദേശിച്ചിട്ടുണ്ട്. ഇതിനിടയിൽ പുതിയൊരു ഫ്രാഞ്ചൈസി കൂടെ അടുത്ത സീസൺ മുതൽ ഉണ്ടാകുമെന്നാണ് റിപ്പോർട്ട്. ഇതോടെ ഐപിഎല്ലിലെ ഒൻപതാം ടീം ഏതാണെന്നത് സംബന്ധിച്ച് അഭ്യൂഹങ്ങൾ ക്രിക്കറ്റ് പ്രേമികൾക്കിടയിൽ പരക്കുകയാണ്. സൂപ്പർ താരം മോഹൻലാൽ ഒൻപതാം ഫ്രാഞ്ചൈസിയുടെ ഉടമയായേക്കും എന്നാണ് ഒടുവിൽ വരുന്ന ചില സൂചനകൾ.
ഐപിഎൽ ഫൈനലിൽ പ്രതീക്ഷിക്കാതെയുള്ള മോഹൻലാലിന്റെ സാന്നിധ്യം കണ്ടതാണ് ഇത്തരമൊരു അഭ്യൂഹത്തിന് കാരണം. ദുബായ് അന്താരാഷ്ട്ര സ്റ്റേഡിയത്തിൽ ക്ഷണിക്കപ്പെട്ടവർക്ക് മാത്രമാണ് ഫൈനൽ കാണാൻ അവസരം ഉണ്ടായിരുന്നത്. കൊറോണക്കാലത്ത് മോഹൻലാൽ എത്തിയത് ബിസിനസ് ലക്ഷ്യത്തോടെയാണെന്നാണ് ഇപ്പോൾ പ്രചരിക്കുന്നത്.
ഓൺലൈൻ എഡ്യൂക്കേഷൻ പോർട്ടൽ ബൈജൂസിനൊപ്പം ചേർന്നാവും മോഹൻലാലിന്റെ ശ്രമമെന്ന് ദേശീയ മാദ്ധ്യമങ്ങൾ റിപ്പോർട്ട് ചെയ്യുന്നുണ്ട്. ബൈജൂസ് ലേണിംഗ് ആപ്പിന്റെ ബ്രാൻഡ് അംബാസിഡർ കൂടിയാണ് മോഹൻലാൽ. കൊറോണ മൂലമുണ്ടായ സാമ്പത്തിക നഷ്ടങ്ങൾ മറികടക്കാനുള്ള ശ്രമങ്ങളുടെ കൂടി ഭാഗമായാണ് ബിസിസിഐ പുതിയ ഫ്രാഞ്ചൈസിക്ക് അനുമതി നൽകിയത്. അതേസമയം ഒൻപതാം ഫ്രാഞ്ചൈസി സ്വന്തമാക്കാൻ അദാനി ഗ്രൂപ്പും രംഗത്തെത്തിയിട്ടുണ്ട്.
Comments